Los sindicatos d'enseñanza denuncien que'l curriculum que propón Educación ye dañible pa l’asignatura d’asturianu al ponela a competir con otres alternatives

"La Conseyería d'Educación presentó-yos ayeri a los sindicatos d'enseñanza la so propuesta de currículum de primaria. La propuesta d'educación, a la que los sindicatos tienen de plazu hasta'l 23 de febreu pa presentar suxerencies, espeya una xuba de les hores de llingua española, inglés y matemátiques, y da-y, por primer vegada, reconocimientu curricular a la materia d'asturianu, anque nunos términos que ponen a competir l'asturianu con otres materies. Fontes de SUATEA y FETE - UXT criticaron p'Asturies.com la redacción del documentu.

Ello ye que la propuesta d'educación, que pue consultase na web de la Conseyería d'Educación, espeya la enseñanza d'asturianu acordies cola Llei d'Usu y siempre como materia voluntaria, especificando nuna amestadura'l desarrollu curricular de la materia. Sicasí, mientres hasta agora l'alternativa a la clas d'asturianu yera la materia de ""cultura asturiana"" que tampoco tenía desarrollu nin conteníos, específicos, la propuesta del departamentu de Riopedre afirma que ""Quien nun desee cursar Llingua asturiana ha realizará actividaes que contribuyan al desarrollu de competencies básiques, fundamentalmente cola competencia en comunicación llingüística, nel conocimientu y la interacción col mundu físicu, la competencia nel tratamientu de la información y competencia dixital, y la competencia cultural y artística"". Según les fontes consultaes por Asturies.com nos sindicatos d'enseñanza SUATEA, FETE- UXT y CC.OO., colos que pudo ponese en contactu esti mediu, esta redacción supón, na práctica, el poner l'asturianu a competir, en términos asemeyaos a lo qu'ocurrre en secundaria, onde la materia de llingua acusa un baxón grande de matriculación respective a primaria nel qu'influye la competencia que-y faen otres materies mui atractives pa padres y estudiantes, casu d'informática o segundes llingües estranxeres.

Pela parte de SUATEA, el responsable de llingua d'esti sindicatu, Llinu Álvarez Santidrián, esplicó a Asturies.com que la propuesta d'Educación abultába-yos daqué ""insultante"" y ""fuera de llugar"". El sindicalista esplicó que la so organización llevaba tola mañana de güei recibiendo llamaes d'afiliaos ""indignaos"" pol testu d'Educación y aseguró qu'esta propuesta ""demuestra que la supuesta sensibilidá del Conseyeru Riopedre pa col asturianu ye nula"". La organización emitió a última hora d'esta mañana un comunicáu en que califica de ""agresiva y malintencionada"" la propuesta del proyectu de decretu y pide, de nun s'eliminar esta propuesta con respecto a l'asignatura d'asturianu, ""la dimisión del conseyeru d'educación por ser el responsable últimu d'esta situación"".

SUATEA afirma que la redacción de les posibles alternatives a llingua, nes que se fala de ""actividaes que contribuyan al desarrollu de competencies básiques, fundamentalmente cola competencia en comunicación llingüística"" da a entender que ""nel estudiu de la llingua asturiana nun se desenrollen competencies básiques llingüístiques, dalgo que nos paez sangrante y grave por demás"". El sindicatu mayoritariu na enseñanza non universitaria ve nesta regulación un pasu que llevaría a ""la lenta y paulatina desapaición de l'asignatura dientro del sistema educativu asturianu"".

Llinu Álvarez esplicó a Asturies.com que ""les comunidaes autónomes tienen competencia pa desarrollar el 35% de les hores llectives con conteníos propios o dando más hores a los estudios comunes. Les comunidaes con llingua propia oficial tienen yá un mínimu d'hores acutaes por llei, dalgo que nun pasa nel casu del asturianu, qu'ocupa una hora y media a la selmana na primaria asturiana. Nel nuevu desarrollu curricular, l'asignatura d'asturianu queda con 315 hores en tola etapa de primaria, les mesmes hores que tien l'asignatura de relixón, mientres qu'asignatures como llingua castellana o inglés"". El sindicalista ve nello un gran agraviu comparativu al qu'hai qu'amestar el fechu de que mientres l'asignatura d'asturianu va ser evaluable, les sos optatives nun van selo, colo que ""van facese más atractives al nun tener repercusión nel espediente del escolín"".

Pela parte de FETE - UXT, la responsable de llingua d'esti sindicatu, María José Secades espresóse p'Asturies.com en términos asemeyaos a los del representante de SUATEA. Secades ve nesta propuesta d'Educación ""una manera d'eliminar l'asturianu del sistema educativu"" y asegura que ""el curriculu trata a l'asturianu d'una manera tan ambigua que lu fai quedar peor de lo que taba"". Al paecer de la sindicalista d'UXT, en tou casu habria que ""buscar una optativa a llingua que tuviere rellacion con Asturies y la so cultura"" y non ""poner a l'asignatura a competir con toles demás materies curriculares treslladando a primaria la situación que se da en secundaria."" Secades fizo un llamáu a que que ""los sindicatos nos pongamos en contactu pa entornar esto, porque si acaben col asturianu na escuela primaria dempues de tantos años, ello sedría un gravísimu pasu atrás"". Finalmente, la representante de FETE llamentó'l procedimientu de la Conseyería pa debatir el documentu al proponer un plazu de ""suxerencies"" que da a entender que se trata d'una propuesta zarrada.

Finalmente, dende la estaya d'enseñanza de CCOO, el so secretariu xeneral Luis García quixo en primer llugar ""denunciar la priesa cola que se presentó'l proyectu dende Educación, ensin danos tiempu a debatir nin estudiar"". Con too y con ello, García precisó a Asturies.com que ""nel pocu tiempu que tuvimos pa estudialu vemos que se-y da mui pocu apoyu al asturianu"" al ponelu a competir con alternatives que da llugar a que se dexe d'escoyer asturianu"". García fexo una comparanza col casu de l'asignatura de relixón, onde ""cada centru pue facer una alternativa a esta materia que nun suponga una competencia directa a la relixón"", mientres que lo que se propón pal asturianu ""pue dar muncho que pensar a los padres enantes d'escoyer asturianu"". El responsable de CC.OO nun dulda n'afirmar que ""l'asignatura queda peor de lo que taba y sal claramente desfavorecida"". Porque ""ye ponela a competir con otres como ocurre en secundaria""."