Entamen les actividaes de l’asociación Asturianía Moza Americana

"El pasáu sábadu 20 de Xineru, nel marcu de II Alcuentru de la Mocedá pola Asturianía de Conu Sur, un cientu de mozos y moves que trabayen en pro de l'asturianía d'estremaos llugares de l'Arxentina, Chile y Uruguay, entamaron l'Asociación Asturianía Moza Americana. La entidá naz como resultáu de delles conclusiones que s'espeyaron nel I Alcuentru de la Mocedá pola Asturianía de Conu Sur, que se celebrare en xineru del 2005 en Mendoza. La idea volvió a apaecer nel III Congresu d'Asturianía, que se fexo en Xixón el pasáu branu del 2006 hasta garrar definitivamente forma nesti 2007, en que yá cuenta con una directiva encabezada por Leonardo Quercetti, del centru asturianu de Mendoza (Arxentina), Javier Viego, de la comunidá asturiana de Valparaíso (Chile) y Jorgelina Cortés, de Rosario (Arxentina).

Los responsables d'esta asociación nueva aclarien que nun intenten ""suplantar nin degradar"" les instituciones yá existentes, respetando a los Centros Asturianos y les Cases d'Asturies, y qu'en cuenta d'ello lo que pretende ye precisamente reforzalos formando una rede ""aterritorial"" de xente mozo con voz propio dientro d'Asturies y n'América. La organización yá cuenta colos sos primeros preseos pa funcionar, ente ellos la figura del Dinamizador Local, persona encargada de recoyer las inquietúes de la mocedá y tresmitiles a la so Xunta Directiva y que sirve pa meyorar la comunicación ente esta rede espardida per bien de países. Otra de les primeres iniciatives de l'Asociación ye la creación d'un portal web onde tolos socios puean aportar idees y nel que van tar informaos de les últimes noticies alredor de la mesma.

Ente los oxetivos más inmediatos de l'asociación ta, en primer llugar, el consiguir la regulación llegal de l'asturianía d'adopción ""como principal midida pa garantizar la supervivencia de les Comunidaes Asturianes"" dientro de la reforma de la Lllei d'Asturianía. L'Asociación albidra qu'esto ye dalgo imprescindible en cuantes que'l 70%-80% de la xente mozo que participn activamente nos Centros Asturianos son yá non descendientes directos d'emigrantes asturianos.

L'Asociación quier tamién que se-y reconoza'l derechu a participar ""de forma activa"" nes regulaciones llegales qu'afecten a l'asturianía, y concretamente na reforma de la Llei d'Asturianía, al empar qu'asitiase como garante de los derechos de la mocedá nos centros y comunidaes asturianes. Asturianía Moza Americana asegura qu'hai Centros onde se-y niega la participación nes Xuntes directives a la mocedá o onde les muyeres tán n' inferioridá de derechos respective a los homes en cuantes que nun puen votar nes asamblees."