L-R protagoniza'l primer conciertu de la UABRA

Actuaciones musicales, conferencies y una esposición complementen les clases.

La Universidá Asturiana de Branu (UABRA) avanza en Cangas del Narcea na so primer selmana, qu'acueye les primeres leiciones del 'Cursu Elemental de Llingua Asturiana’, el ‘Cursu Avanzáu de Llingua Asturiana’ y ‘Curso de Gallego-asturiano’ (fase primera), amás del de ‘Capacitación pa la traducción al asturianu’ dientros de los ‘Cursos d’Afondamientu Cultural y Llingüísticu’. Una vegada finada l'actividá llectiva diaria, alumnos y profesores pueden disfrutar de delles opciones incluyíes nel programa como xeres complementaries, abiertes tamién a tola ciudadanía.

La primera tuvo llugar ayeri y consisitió nuna conferencia a cargu del biólogu y miembru numberariu del RIDEA Víctor Manuel Vázquez, que llevó'l títulu de ‘L’osu n’Asturies: implicaciones sociales y económiques’. Güei, mientres, comiencen los conciertos, siendo'l primeru'l de L-R, el dúu de post-folk compuestu por Leticia Baselgas y Rubén Bada, con discu nuevu baxo'l brazu, que vien d'enllenar la Plaza Mayor de Xixón nel Festival Arcu Atlánticu'l sábadu con una cita especial entitulada 'L-R & Amigues'.

La d'esta nueche va ser a les 22.30 hores nel Teatru Toreno. Mañana, mentes, a les 19 hores nel salón d’actos de la Escuela-Hogar, va desendolcase la xera complementaria cabera de la selmana, que va protagonizar el periodista de TPA Cristóbal Ruitiña y lleva'l nome de ‘Úa television pública al servicio d’Asturias'.

Otra manera, hasta'l fin de la UABRA pue visitase na Casa de la Cultura Palaciu d’Oumaña la esposición itinerante ‘Voces. La llingua asturiana al traviés de los sieglos’.

Na semeya, Bada y Leticia Baselgas, nel centru, saluden al públicu xunto a dalgunes de les collaboradores tres el conciertu del sábadu de Festival Arcu Atlánticu de Xixón.