El Ministeriu de Cultura interésase pol casu de la Térmica d'Avilés

"La Plataforma ""Salvemos la Térmica"" que defende la conservación de l'antigua central térmica d'Ensidesa-Avilés pol so valor como patrimoniu históricu y la so reconversión n'equipamientu cultural, recibió ayeri rempuesta al escritu qu'unviare al serviciu de Protección del Patrimoniu Históricu del Ministeriu de Cultura col envís de paralizar el derribu de les instalaciones de l'antigua fábrica, qu'entamó'l pasáu 3 de xineru.

Na so carta, el departamentu ministerial esplica que va pidir información sobre los fechos al Ayuntamientu d'Aviles y a la Dirección Xeneral de Promoción Cultural del Principáu d'Asturies, entrugando si la demolición pue afectar a elementos singulares del patromoniu, acordies cola denuncia de la plataforma, que s'afita na existencia d'un proyectu museísticu pa los edificios y a l'articuláu de la llei española de patrimoniu de 1985 pa lograr la salvación del edificiu.

La carta del Ministeriu de Cultura amiéstase a los escritos d'otres instituciones que declararon el so interés y esmolecimientu pola situación del históricu edificiu de la dácada de 1950. El comité español de la UNESCO, que pidiere directamente'l cancelamientu del derribu, y el Defensor del Pueblu, qu'almitió a trámite un escritu de la Plataforma cívica y ta estudiando'l casu, son hasta agora les voces de mayor autoridá que falaron nel asuntu.

Nel branu del 2004, la Conseyera de cultura Ana Rosa Migoya fexo una visita a la térmica, daquella entovía en funcionamientu, na qu'anunció la instalación nella d'un gran equipamientu cultural pal que llegó a convocase un concursu d'idees. La llegada de proyectos industriales como'l grupu eléctricu a gas de ciclu combináu que proponía la empresa Isastur nel sitiu de la vieya térmica punxo un primer puntu de dulda nes intenciones pal históricu edificiu, pero foi cola apaición pública del proyectu del Centru Cultural Niemeyer pa la Ría d'Avilés que la térmica desapeció de l'axenda del executivu asturianu y del mesmu equipu de gobiernu d'Avilés, que pasaron de defender el futuru de la térmica a proponer el so derribu. La oposición del PP y ASIA nel conceyu avilesín llegó a forzar un plenu estraordinariumayoría de doce votos de PSOE y IX-BA contra los 10 de PP y ASIA roblaron el destín de la térmica de Valliniello."