CaleyAvilés visita'l cascu históricu de la villa

Escosaes toles places pa esta salida de baldre guiada n'asturianu por Denis Soria.

Esti vienres, a les 19 hores dende El Parche, va tener llugar la tercer salida de les cuatro programaes esti branu dientro de la iniciativa CaleyAvilés de la Estaya de la Llingua d'Avilés. Esta actividá de baldre, entamada con ésitu tolos años dende'l 2016, permite conocer dellos llugares del conceyu acompañáu d'un guía qu'emplega la llingua asturiana.

Tres salir al parque Ferrera en xunu y al parque de La Madalena, en xunetu, esti agostu toca caleyar el cascu históricu d'Avilés, con visita a la capiella de los Alas. Soria va encargase nesta ocasión d'encabezar esta ruta per Avilés, pa la que yá s'escosaron toles places esta mesma mañana.

Sicasí, yá ye posible apuntase pa la siguiente, prevista pa la tarde del vienres 6 de setiembre, al Cementeriu de La Carriona y al barriu de Miranda, guiada tamién por Soria. La xente interesao ha de ponese en contatutu cola Estaya de la Llingua al traviés del númberu de teléfonu 985.54.55.08 o del corréu electrónicu estayallingua@aviles.es.

Na imaxe, capiella de los Alas. Semeya obra d'HombreDHojalata baxo llicencia CC BY-SA 3.0.