Berta Piñán prometió n'asturianu'l so cargu de conseyera de Cultura

Foi la única de los diez n'emplegar l'idioma.

La Xunta Xeneral acoyó ayeri la toma de posesión de les conseyeres y conseyeros d'Adrián Barbón. Foi nun actu solemne nel que'l presidente d'Asturies solicitó-yos "trabayu, cercanía, diálogu y atrevimientu", amás de "munchos otros requisitos, como la tresparencia, la rendición de cuentes o'l fomentu de la participación ciudadana, pero digamos qu'ésos deben ser los rasgos del vuesu mandatu".

Enantes, Juan Cofiño, Rita Camblor, Ana Cárcaba, Enrique Fernández Rodríguez, Carmen Suárez Suárez, Pablo Ignacio Fernández Muñiz, Melania Álvarez García, Alejandro Calvo, Berta Piñán y Borja Sánchez García prometieron el so cargu énte l'Estatutu d'Autonomía y la Constitución española. Toos usaron pa ello'l castellanu, cola esceición de Piñán, conseyera de Cultura, Política Llingüística y Turismu, qu'emplegó l'asturianu.

Na semeya, Genaro Alonso, anterior conseyeru d'Educación y Cultura y tamién académicu, saluda a Piñán nel actu de trespasu de carteres con Suárez, conseyera d'Educación nueva, observándolos.