Éstes son les competencies de la nueva Conseyería de Cultura

Queda pendiente de conocer la so estructura.

A les 16 hores d'esta tarde va tener llugar l'actu de toma de posesión de les conseyeres y conseyeros del Gobiernu d'Adrián Barbón. Nes diez conseyeríes –hai una nueva y Educación y Cultura divídese en dos– va haber trespasu de carteres, yá que nengún de los ochos titulares del Executivu de Javier Fernández repite.

Berta Piñán va garrar la nueva de Cultura, Política Llingüística y Turismu, que, como diz el nome, va tener ente les sos competencies la "política llingüística y normalización". El restu, según s'afita nel Boletín Oficial del Principáu d'Asturies (BOPA), son la promoción de la cultura, nes sos manifestaciones diverses; la xestión de los equipamientos culturales de titularidá pública; la proteición y difusión del patrimoniu cultural y históricu; biblioteques, archivos y museos; deporte; y turismu.