Un Gobiernu conformáu por diez conseyeríes

"Ye un Gobiernu qu'apuesta pola solvencia, totalmente renováu, paritariu y con una fonda renovación xeneracional", destaca Barbón.

El presidente d'Asturies dio a conocer ayeri l'organigrama del so Executivu, que va tar conformáu por diez conseyeríes, dos más que na llexislatura anterior. Crea la Conseyería de Ciencia, Innovación y Universidá, que va tar dirixida por Borja Sánchez García, mentes que divide Educación y Cultura, con Carmen Suárez Suárez y Berta Piñán –presentada por Adrián Barbón como "una de les escritores más importantes n'Asturies, poeta, con una lliteratura n'asturianu mui potente"– al frente, de manera respeutiva, ésta última tamién con Política Llingüística y Turismu.

"Los perfiles escoyéronse en función de los sos conocimientos personales, de les sos árees d'influencia y el trabayu y la capacidá qu'amosaron en diferentes ámbitos", destacó Barbón, que tamién calcó na paridá del so Executivu, con cinco muyeres y cinco homes nes conseyeríes. Ente les novedaes ta que la Direición Xeneral de Polítiques d'Igualdá y el Comisionáu Frente al Reto Demográfico pasen a depender de la Conseyería de la Presidencia, amás de la recuperación de la figura de la vicepresidente del Gobiernu, que sólo esistió nel periodu 1991-1993, cargu que va ocupar el tamién responsable d'Infraestructures, Mediu Ambiente y Cambiu Climáticu, Juan Cofiño.

L'organigrama definitivu del Gobiernu queda asina:

• Presidente: Adrián Barbón.
• Vicepresidente y conseyeru d'Infraestructures, Mediu Ambiente y Cambiu Climáticu: Juan Cofiño.
• Conseyera de Presidencia: Rita Camblor.
• Conseyera de Facienda: Ana Cárcaba.
• Conseyeru d'Industria, Emplegu y Promoción Económica: Enrique Fernández Rodríguez.
• Conseyera d'Educación: Carmen Suárez Suárez.
• Conseyeru de Sanidá: Pablo Ignacio Fernández Muñiz.
• Conseyera de Derechos Sociales y Bienestar: Melania Álvarez García.
• Conseyeru de Desarrollu Rural, Agroganadería y Pesca: Alejandro Calvo.
• Conseyera de Cultura, Política Llingüística y Turismu: Berta Piñán.
• Conseyeru de Ciencia, Innovación y Universidá: Borja Sánchez García.

Na imaxe, Barbón nel momentu d'anunciar la composición del so Gobiernu. Semeya obra d'Armando Álvarez.