El Sinn Feinn acepta l'autoridá de la policía del Ulster

"El Sinn Fein, principal partíu católicu d'Irlanda del Norte, decidió ayeri nuna votación histórica'l reconocimientu de la policía y les autoridaes xudiciales del Ulster. El líder históricu del partíu, Gerry Addams, pidía'l votu favorable a esti reconocimientu, que sofitó, a mano llevantada, una gran mayoría de los cerca de 900 delegaos con derechu a votu n'asamblea estraordinaria o ""Ard Fheis"". Addams recordó n'asamblea los llazos de vieyo ente la policía norirlandesa y los grupos violentos unionistes, pero esplicó que yera preciso pasar fueya p'avanzar nel oxetivu final d'unificación d'Irlanda.

El reconocimientu de l'autoridá de la policía y xueces del Ulster yera una condición obligatoria puesta pol primer ministru irlandés Bertie Ahern y pol británicu Tony Blair pa la recuperación del gobiernu autónomu de la provincia, en suspenso dende'l 2002, pal 26 de marzu, con elecciones previes el día 7 d'esi mes. D'esta miente, el Sinn Feinn y los protestantes podríen formar un gobiernu de coalición acordies colos términos del ""Alcuerdu de Saint Andrews"".

Sicasí, la moción aprobada presenta delles amestadures pa condicionar y llendar l'actuación de la dirección del Sinn Feinn nun asuntu como esti, que nun dexa de suponer la negación d'ún de los principios históricos de la formación republicana. D'esta miente, la executiva del Sinn Fein namás va aplicar los conteníos de la propuesta en restaurándose les instituciones del Gobiernu autónomu norirlandés y en completándose la tresferencia de les competencias de Xusticia y Interior en mayu del 2008.

Más información en Web del Gobiernu del Ulster BBC Revista Ann PoblachtWeb del Sinn Feinn"