CC.OO. denuncia qu'Asturies tien el mayor escesu d'ufierta de vivienda del estáu

"El sindicatu Comisiones Obreres CC.OO. denunció qu'Asturies ocupa'l primer llugar de toles comunidaes autónomes en ""escesu"" d'ufierta de viviendes, contando con toles variables demográfiques aplicables, siguida por Cantabria, Castiella y Lleón, Estremadura y Galicia. Por ello l'agrupación uvieina de CC.OO. propunxo la creación d'una ""Mesa pa la Sostenibilidá na Construcción de la Edificación n'Asturies"" énte'l ""boom inmobiliariu que se rexistra"" siguiendo una iniciativa que CCOO diz que yá s'apllicó con éxitu en Galicia con bonos resultaos.

El sindicatu diz qu'esta Mesa tendría como oxetivos ""el desarrollu d'esfuerzos empobinaos a la promoción y espardimientu del conceptu de sostenibilidá"" pa qu'esta idea caltrie ""nel comportamientu habitual de la sociedaá y del profesional en particular"". CC.OO sorraya como ""les ciudaes consumen les tres cuartes partes de los recursos mundiales"" y que la construcción y el caltenimientu de los edificios representen cerca del 40% de los materiales utilizaos; el 35% de la enerxía que se consume y qu'apurren el 50% de les emisiones y basura, amás de consumir el 25% de la madera que se gasta nel mundu.

Como datu, CC.OO esplica que n'España consúmense tolos años 451 millones de tonelaes d'áridos, de les que'l 65% úsense pa facer hormigón y esfaltu, dalgo que lleva a un ""estáu insostenible"" mediuambientalmente."