Los ecoloxistes afirmen qu'Avilés tien el peor aire d'España

"El Colectivu Ecoloxista d'Avilés emitió un comunicáu de prensa en qu'asegura que la comarca avilesina tien ""el peor aire d'Asturies y, al empar el peor d'España"" ello mientres ""l'Ayuntamientu mira pa otra parte"". El grupu ecoloxista parte de datos apurríos pol Serviciu de Calidá del Aire del Principáu d'Asturies p'afirmar que la ciudá incumple les normes ambientales el 71% de los díes del añu y que la concentración media de contaminantes ""dobla los niveles consideraos como de mala calidá ambiental"".

Les estaciones de midición de Llaranes y del mataderu, qu'atiesten con Corvera y Castrillón apurren los peores datos, sobremanera en partícules en suspensión PM10, un axente contaminante que perpasó los niveles encamentaos pa la salú en 257 díes del añu, cuando'l tope añal ye de 35 díes. N'óxidu de nitróxenu (N0x y NO2) la media añal avilesina foi de 43 ug/m3, perpasando'l valor tope añal de de protección a la salú humana de 40 ug/m3. No tocante a dióxidu d'azufre (SO2) perpasóse'l tope horariu nuna ocasión na que se llegó a los1187 ug/m3, cuando'l máximu ta apautáu en 350 ug/m3. L'únicu contaminante que nun pasó los máximos foi l'ozonu. El Colectivu Ecoloxista píde-y al Ayuntamientu que ""asuma les sos responsabilidaes"" y que trabaye pa que ""se reduzan los elevaos niveles de contaminantes producíos por una industria a la que se-y consiente funcionar en precariu y d'un tráficu escesivu""."