L'Efmo.com ganó tres una prórroga y pónse segundu

"L’Efmo.com ganó por 83 a 87 na so visita al Pabellón Ourense, un equipu que ta últimu na clasificación, pero que ganara los sos últimos partíos, y pa ello tuvo que xugase una prórroga. El partíu finó con un empate a 74 y na prórroga les avilesines entamaron con 0 a 9 y ello venceyó l’alcuentru del so llau. Agora les asturianes son segundes con trelce victories y tienen delantre al Badajoz -catorce victories- y tres d’elles al Universitario de Ferrol y Zamora –doce victories-.

El partíu foi mui igualáu y asina llegóse al descansu con una ventaya asturiana de cuatro puntos, 34 a 38. Na segunda parte siguió la igualá y finó l’alcuentru con esi empate a 74. Hai que destacar que l’equipu avilesín perdió munchos balones, un total de 26 por 17 de les locales. Les personales foron una llosa pa l’equipu orensanu pues ficieron 30 y acabaron con trés xugadores en campu al quedar eliminaes cinco de les sos xugadores y finar el partíu con trés en campu.

Les asturianes tuvieron permal nel tiru esterior, metiendo trés canastes de trés puntos de trelce intentos –un 23%- Nel equipu asturianu hai de destacar a Jerica Watson (fizo dobles figures -25 puntos y 12 rebotes-, 3 asistencies, 1 balón recuperáu y 5 perdíos, punxo 6 tapones, ficiéron-y 6 personales y tuvo una valoración de 42 puntos) y Berta Siñol (24 puntos, 8 rebotes, 5 asistencies, 1 balón recuperáu y 8 perdíos, punxo 1 tapó y punxéron-y otru, ficiéron-y 11 faltes y tuvo una valoración de 26 puntos). Nel equipu gallegu destacaron María Ylenia Manzanares (tamién con dobles figures -16 puntos y 10 rebotes-, 5 asistencies, 1 balón recuperáu y 3 perdíos, punxéron-y 1 tapón y ficiéron-y 6 faltes personales) y Raquel Asensio (29 puntos, 2 rebotes, 2 asistencies, 2 balones recuperaos 1 perdíu, punxéron-y 1 tapón y ficiéron-y 5 faltes personales).

Ficha téunica:

Pabellón Ourense: Raquel Asensio (29), Verónica Blanco (6), Bárbara Lamelo (2), Tywanna Inmon (11) y María Ylenia Manzanares (16). Tamién xugaron: Isabel Aguilar (5), Mar Ahijado (10) y Lucía Méndez (4).

Efmo.com: Berta Siñol (24), Orinta Kavaliauskaite (16), Devon Campbell (4), Isabel García (8) y Dace Cinite (10). Tamién xugaron: Jerica Watson (25), Isabel Suárez, Maite Riera y Debora Abreu. Árbitrios: Francisco Javier Rodríguez y Juan Alberto Pinela. Nel Efmo.com foi eliminada por cinco personales Orinta Kavaliauskaite y nel equipu gallegu Bárbara Lamelo, Tywanna Inmon, Mar Ahijado, Lucía Méndez y María Ylenia Manzanares.

Partíu de la decimosétima xornada de la Lliga LEB 2 xugáu nel Pabellón Municipal de los Remedios d’Ourense. Parciales per cuartos: 22-23, 12-15, 22-22, 18-14 y 9-13 (prórroga)."