Sal a la venta'l discu nuevu de "Fe de Ratas"

"Dende esta selmana ta a la venta l'últimu discu del grupu asturianu de rock ""Fe de Ratas"". ""I want you en la democracia de mi ombligo"" ye'l títulu del quintu trabayu d'estudiu d'esta banda liderada pol so cantante y fundador Maxi y na que rescampla la presencia del guitarrista Rafa Kas. Producíu por Dani Sevillano y grabáu nos estudios Lorentzo Records de Berritz y Eclipse d'Uviéu, el discu presenta 12 temes.

Los miembros de ""Fe de ratas"" definieron el discu como ""rápidu, irónicu, duru y con mui mala hostia"" y como'l que más trabayu de producción y arreglos tomó en tola historia del grupu. El componente de protesta política nun falta nesta entrega nueva de la banda asturiana, con cantares dedicaos a les tortures del gobiernu Bush en Guantánamo y Abhu Graib o una versión de ""Amanda"" tema de cabecera del cantautor chilenu Víctor Jara, desapaecíu na dictadura de Pinochet. La banda va entamar agora una riestra de conciertos de presentación. El día 2 de febreru van pasar pela FNAC de Siero pa enseñar el trabayu a la xente de casa y darréu el grupu va colar pa dar conciertos en Canaries, Burgos y Soria, ente otros llugares .
Más información na web del grupu"