El Valladolid derrotó a un Sporting qu'acabó con nueve futbolistes

"El Sporting de Xixón amestó una derrota más nun mes de xineru catastróficu. Anque l'equipu de Manolo Preciado planteó un bon partíu, les decisiones arbitrales, con dos espulsiones nel equipu asturianu, y el gol sicolóxicu del Valladolid, que marcó nel minutu 44 del primer tiempu, forzaron un resultáu mui negativu pal Xixón.

El Sporting llantóse en Nuevu Zorrilla como'l gran equipu que ye nes sos salíes fuera del Molinón. Anque'l xuegu nun yera especialmente bonu, les ocasiones, anque poco definíes, llegaben siempre protagonizaes polos asturianos, qu'apertaben l'acelerador pa esfacer la riestra de malos resultaos que lleven nel 2007. Sicasí, la ""suerte de los campeones"" cayó del lau del equipu local, que, nel últimu de la primer parte llograba adelantase nun saque de falta que remataba de cabeza García Calvo, ún de los futbolistes menos goleadores del canpeonatu. Foi l'únicu fallu de la dfensa del Sporting.

Col mazu del gol enriba, el Sporting salió ensin complexos a facer un bon segundu tiempu, pero lo qu'alcontró foi a Bernabé Gutiérrez, un árbitru qu'alambró a tarxetes al equipu asturianu y qu'espulsó, de manera mui cuestionada, a Michel y Samuel en cuestión de diez minutos. Con namás 8 futbolistes de campu, el Sporting intentó entornar el marcador y foi quien a acorripiar nel so campu al Valladolid en busca d'un empate que nun diba llograr. Edwin Congo túvolu mui cerca nun tiru rasu que'l porteru local disvió a corner con munches dficultaes nel mesmu minutu 90."