PP y IX condenen el repartu de llicencies de la TV Dixital Terrestre

"El presidente del PP Ovidio Sánchez acusó al Gobiernu asturianu de dar les llicencies de televisión dixital terrestre (TDT) ""por amiguismu"" sobremanera no tocante a la única llicencia d'ámbitu autonómicu que salía a concursu y que foi pa la matriz de la canal Localia, empresa que pertenez al grupu Prisa. Pa Ovidio Sánchez, la decisión ye ""un escándalu y una cacicada"" que ""dexa fuera a empreses del sector"". El líder popular comprometióse a sacar a concursu más llicencies en casu de llegar al poder ""pa que naide quede fuera"" y declaró que diba pidir la comparecencia del conseyeru Jaime Rabanal pa que ""dé esplicaciones"" sobre los criterios polos que se mandaron pa otorgar les llicencies.

Tamién Izquierda Xunida, socia de gobiernu de la FSA-PSOE, declaró'l so malcontentu col repartu de llicencies. El grupu parlamentariu de la coalición pidió-y al conseyeru Rabanal que rectifique y que ""nun escluya a naide"" del repartu de llicencies. La coalición recuerda que la decisión de repartu de llicencies féxola la Conseyería d'Economía independientemente ensin que'l restu del gobiernu tomare parte na mesma, polo que nun se sienten vinculaos con ella, y declara'l so esmolecimientu polo que vaya pasar coles plantiyes de les televisiones que quedaron fuera del repartu en llegando'l momentu del ""apagón analóxicu"" pol que les canales tradicionales de TV van desapaecer, sobremanera teniendo en cuenta que son empreses bien d'elles ""identificaes con Asturies, con una presencia estable na última década y con índices d'audiencia importantes"". IX afítase nel criteriu de que naide que cumpla colos criterios mínimos esixibles quede fuera de les llicencies y da anuncia de la presentación d'una iniciativa non de llei na Xunta Xeneral nesti sentíu."