Podemos reclama una conseyería con competencies direutes sobre l'asturianu

Rafa Palacios afirma en Bimenes que van plantegar otra vuelta la reforma del Estatutu.

Nel marcu de la la XXIII Fiesta de la Oficialidá, onde acudió acompañáu pola tamién parllamentaria Nuria Rodríguez, el diputáu de Podemos reclamó pa esta llexislatura "el desarrollu de polítiques de normalización llingüística y una direición xeneral que s'ocupe direutamente d'esti asuntu nuna conseyería que tenga ente les sos competencies tolo que tenga que ver col desarrollu de la llingua asturiana". "Nun pasa too pola oficialidá, pero evidentemente la oficialidá resolvería toes estes cuestiones", añadió.

Pa la declaración del asturianu como llingua oficial ye necesaria una reforma del Estatutu que Podemos va plantegar anque, a priori, nun se puedan sumar los trés quintos necesarios del Parllamnetu –tampoco nun se pue repetir la fórmula del añu pasáu xunto con IX p'abrir el procesu, siendo necesario l'apoyu de la FSA–, según confirmó Palacios. "Quiero recordar, porque ye importante, que la pasada llexislatura había númberos suficientes pa ello y el PSOE negóse, y ésta vamos a insistir. Si nun hai númberos habrá que buscalos, y en cualquier casu hai qu'abrir l'alderique de la reforma del Estatutu" nel qu'incluyir, amás de la oficialidá, "el fin de los aforamientos y el blindaxe de los derechos económicos, sociales y culturales que-y correpuenden a Asturies", asina como dexar nidiu nel testu "el carauter públicu de la televisión asturiana y la xestión direuta por parte d'Asturies d'esi mediu de comunicación".