Ayeri volaron los últimos aviones d'Air Asturias

"Llegó la hora del pieslle p'Air Asturias, qu'operó ayeri los sos dos últimos vuelos con Madrid. Dos meses dempués d'entamar operaciones, Air Asturias tranca, según la so propia versión, pola baxa demanda de los sos servicios, causada en parte por errores propios como la mala xestión de venta de billetes. La empresa, que reconoz qu'había mercáu potencial pa les sos llinies, como demuestra'l fechu de qu'Easy Jet vaya poner serviciu ente Asturies y Madrid, enfótase de cualquier manera en poder volver a l'actividá en reorganizándose y dempués d'estudiar posibles llinies más rentables nes qu'operar.

La cadena d'hoteles asturiana Celuisma, que fuera accionista de la compañía quebrada Air Madrid, y el grupu inmobiliariu asturianu Mall son los principales accionistes de Asturias Airlines S.A. La empresa presentóse nel 2005 cola intención d'operar dende Asturies coles principales ciudaes d'Europa. Les conexones que llegó a operar nos sos dos meses d'existencia foron colos aeropuertos de Madrid, Lisboa y París. Vota y opina sobre esta noticia en Conceyu Abiertu"