Los llagareros piden el mesmu tratu que la cerveza y el vinu na llei sobre bebíes alcoholiques

"L'Asociación Española de Sidra pidió que se-y dea a esta bebida un tratu específicu asemeyáu al del vinu y la cerveza, bebíes fermentaes de baxa graduación alcohólica, nel anteproyectu de Llei de Prevención del Consumu de Bebíes alcohóliques, que tien d'aprobase d'equí a poco en Congresu de los Diputaos y que contién delles iniciatives empobinaes principalmente a la mocedá. Midíes de prevención y promoción de la salú, restricciones a la vienda y consumu de bebíes alcohóliques; y llimitaciones a la publicidá y promoción de bebíes alcohóliques van ser los exes de la llei.

L'asociación estatal qu'axunta a los llagareros y productores de sidra argumenten que la sidra tiene un aniciu agrariu y un usu alimentariu lo mesmo que la cerveza y el vinu, siendo la sidra, cola cerveza, la bebida de menor graduación alcohólica, con graduaciones ente los 4 y 6, mientres que'l vinu múevese na banda de los 12º-15º y los destilaos alléguense a los 40º, polo que pide un mesmu tratamientu pa toles bebíes de menos de 20º y qu'estes s'estremen de les destilaes. Los empresarios de la sidra defenden la so petición en que la sidra consúmese en grupu ""como parte fundamental de la rellación social y acompásñase xeneralmente d'otros alimentos, dalgo que potencia, con un consumu moderáu, los sos efectos beneficiosos sobre la salú"". Los profesionales del sector declárense al favor de les midíes pa evitar que se vienda bebida a menores d'edá y tamién son partidarios de l'autorregulación na publicidá.

La sidra mueve n'España 70 millones de llitros al añu, con con un valor económicu de cerca de 50 millones d'euros. Amás d'Asturies, que produz el 80% de tolo que se fai nel estáu, los otros principales productores son el País Vascu, Galicia y Navarra."