El sindicatu SUATEA defende a Faustino Zapico nel casu de la tésis n'asturianu

"El sindicatu d'enseñanza SUATEA emitió ayeri un comunicáu en que manifestó ""formal y públicamente"" la so indignación pol casu de la refuga a la presentación de la tésis doctoral del historiador Faustino Zapico, que ye afiliáu a esta organización. El sindicatu ellaboró con motivu d'ello un resume de testos llegales que llexitimen, al paecer de la organización, el derechu del investigador a presentar el so trabayu n'asturianu y qu'espeyen les contradicciones que'l sindicatu ve n'actuación de la universidá.

SUATEA esplica como nel artículu 4 de los estatutos universitarios, que se refier los Fines de la institución afítase que la Universidá ha deduicase a ""la creación, desenrollu, tresmisión y crítica de la ciencia, la técnica y la cultura"". El sindicatu d'enseñanza nun ye a entender cómo s'apoyen estes idees ""si nin siquier dexen que dalguién presente una cosa por tar escrita n'asturianu"". N'otra parte d'esti mesmu artículu fálasede ""La contribución a la formación de ciudadanos llibres, promoviendo una actitú crítica y participativa na Universidá y na sociedá"" dalgo que, pa Suatea, concasa mal cola ""represalia a persones qu'usen l'idioma d'Asturies"". El sindicatu d'enseñanza tamién ve que la institución universitaria contradizse nel apartáu en que fala de ""la defensa y potenciación del diálogu pacíficu y del respetu mutuu como formes de rellación ente los pueblos"" cuando ""nun se respeta la máxima forma d'espresión de la cultura d'un pueblu como ye l'idioma"".

Yá nel artículu 6 de los sos estatutos la Universidá diz que ""orientará de manera relevante les sos actividaes a la realidá y l'ámbitu d'Asturies"" y afirma que ""la llingua asturiana sedrá oxetu d'estudiu, ensiñu y investigación nos ámbitos que correspuendan y que'l so usu tendrá'l tratamientu qu'establezan l'Estatutu d'Autonomía y la llexislación complementaria, garantizándose la non discriminación de quien la emplee"" puntos que lleven a SUATEAa entrugase ""si la Universidá desconoz l'articuláu de la llei d'usu del asturianu"".

El sindicatu remata diciendo que ""hai conflictu llingüísticu y va siguir habiéndolu hasta que nun s'equiparen los derechos de los usuarios de la llingua asturiana colos usuarios de la llingua castellana"" polo que pide pa ello la oficialidá del asturianu."