Valledor diz que Gustavo Bueno defende la mesma idea d’España que la estrema derecha

"El Conseyeru de Xusticia, Seguridá Pública y Rellaciones Esteriores, Francisco Javier García Valledor, retrucó les declaraciones del filósofu Gustavo Bueno, que dixere ayeri que la llingua asturiana ""nun existía"". Pa Valledor, Bueno""faltó-yos al respetu a tolos asturianos"" y demostró que tien un pensamientu ""totalitariu"" poles sos crítiques al asturianu. Pa Valledor, Bueno defende ""la mesma idea d'España que la estrema derecha"".

El conseyeru diz que conoz ""mui bien"" a Gustavo Bueno, porque tuvo ""la desgracia"" de ser alumnu d'elli cuando pasó pela universidá, cuando ""diba de personaxe progresista nel franquismu"". Yá d'aquella Valledor diz que Bueno ""Defendía un pensamientu totalizante, qu'acabó convertiéndose en totalitariu"". Valledor nun quier cuestionar el llabor filosóficu de Bueno, pero pal conseyeru rescampla que Bueno ""tá mui lloñe de conocer la llingüística y la historia d'Asturies"", ello cuando ""Asturies acoyó a Bueno con tol respetu"".

El filósofu criticare a Valledor enseñando una tarxeta de visita del conseyeru que llevaba'l so cargu escritu n'asturianu, inglés y francés, pero non en castellanu, dalgo qu'enfadó al autor de ""España no es un mito"" por ser un agraviu a la llingua d'España. Valledor esplicó que'l fechu de que la so tarxeta de visita se mandare del asturianu como un procedimientu de ""discriminación positiva"" pa demostrar que ""n'Asturies hai otra llingua amás del castellanu"".

D'otra manera, Valledor manifestó que nun tenía sentíu pedí-y rectificaciones a Bueno como fixeren los socialistes andaluces a Bueno poles sos declaraciones sobre l'estatutu andaluz porque ""rectificar ye de sabios y a Gustavo Bueno fálta-y muncho pa selo""."