Alxudicaes les llicencies de Television Dixital Terrestre n'Asturies

"El Conseyeru d'Economía y Alministración Pública Jaime Rabanal dio anuncia güei de l'alxudicación de les concesiones de licencia de televisión dixital terrestre (TDT) d'ambitu autonómicu y local. La única canal de TDT autónomica que salía a concursu quedó en manes de Productora Asturiana DTV, S. A, matriz de la canal Localia TV. Pela so parte, la Editorial Prensa Asturiana, matriz del periódicu La Nueva España, ye la empresa que lleva mayor númberu de llicencies locales, teniendo permisu pa operar en toles demarcaciones alxudicaes pa la dixital local.

Asina, na demarcación d'Avilés tienen llicencia pa emitir Editorial Prensa Asturiana, El Comercio y Canal 48 Occidente, mientres que na de Cangas de Narcea tienen llicencia concedida Editorial Prensa Asturiana, Canal 48 Occidente y Mollares Pictures. La demarcación de Xixón tien llicenciaos a Editorial Prensa Asturiana, Televisión Local Gijón y El Comercio. La demarcación 4, nel área xeográfica de l'Infiestu, cuenta con permisos pa Editorial Prensa Asturiana, Canal 48 Occidente y UTE Opalo-Onix-Starteam. Tocante a la demarcación 5, de Llanes, hai permisos nella pa Editorial Prensa Asturiana, Canal 48 Occidente, y la UTE Opalo-Onix-Starteam. Na demarcación 6 de L.luarca, van ser Editorial Prensa Asturiana, Canal 48 Occidente y Centro Emisor de Occidente les empreses autorizaes. Na demarcación 8 d'Uviéu, pela so parte, van operar Oviedo Televisión, Editorial Prensa Asturiana y El Comercio.

La demarcación 7, con centru en Mieres, entovía ta pendiente d'una reorganización prometida pol Ministeriu d'Industria, Turismu y Comerciu, polo que ta entovía ensin alxudicar. La zona 7 axunta nun principiu a Mieres, Ayer, L.lena, Llangréu, Samartín del Rei Aurelio y Llaviana. La idea ye estremar d'ella una demarcación propia pa los conceyos de la Cuenca'l Nalón dende Llangréu a Casu ."