Los conceyales d'Andecha Astur sofiten a la Xunta Executiva

"Sigue la crisis dientro de la formación política nacionalista Andecha Astur. Dempués de conocese ayeri la carta que la Xunta Executiva del partíu políticu ta unviando a los afiliaos a la organización y na qu'acusa a un grupu de miltantes d'intentar ""secuestrar"" la organización al traviés del ""nomamientu en Rexistru de Partíos d'una directiva escoyida illegalmente"", esta mesma Xunta Executiva encabezada por Germán Abad emitió güei un comunicáu de prensa en qu'agradez la so ""llealtá a la organización"" por parte del candidatu a les últimes elecciones David Rivas y de Santiago Artime y Violeta Santapaz, los únicos dos conceyales escoyíos colos que cuenta esti partiu y qu'exercen en Carreño y Riosa.

La Xunta Executiva afirma que cuenta, polo tanto, col sofitu de David Rivas, que saliere escoyíu como candidatu d'Andecha Astur a les próximes elecciones autonómiques y que yá encabezare les llistes d'esta organización en convocatories anteriores, y de los dos cargos institucionales de más importancia colos que cuenta'l partíu. Xunta estes persones, la Xunta Executiva diz tener igualmente'l sofitu de destacaos militantes de la organización, ente los que noma al conocíu etnógrafu Alberto Álvarez Peña.

Asturies.com pudo ponese en contactu colos conceyales Santiago Artime y Violeta Santapaz, que confirmaron el so sofitu a la Xunta Executiva. El representante de la formación nacionalista en conceyu Carreño foi más allá declaró que la Xunta Executiva escoyida en Candás ye ""la única válida y democratica"" y que polo tanto elli sofita a esta Xunta Executiva contra l'actuación de lo que definió como ""una minoría d'unos venti militantes"" que ""nun tan dimpuestos a aceptar los alcuerdos de la mayoría del partíu"". Artime esplicó que'l so posicionamientu personal yera ""estensible a tol conceyu d'Andecha Astur en Carreño"" y retrucó a les declaraciones que fexere ayeri Arturu Bermeyu n'Asturies.com, definiendo la situación ""non como un problema de la existencia dos andeches"" sinon como ""un problema de democracia interna, de formes y maneres de rellacionase"". Artime quitó-y toa validez al conceyu nacional del 9 d'avientu en que se reformó la directiva del partíu por parte del grupu d'Arturu Bermeyu, asegurando que se traó d'un Conceyu Nacional al qu'asegura que ""naide me convocó"" y que se fexo ""d'espaldes a la mayoría de la organización"". El conceyal d'Andecha en Carreño apuntó que'l debate nun pue plantease en términos ""de qu'Andecha quiera convertise en daqué asturianista y abandonar el nacionalismu"" siendo pa elli l'auténticu discutiniu'l fechu de que ""la organización quier medrar y hai una mayoria dientro d'ella qu'entiende qu'hai que cambiar les formes pa poder facelo"".

D'otra manera, la Xunta Executiva qu'encabecen German Abad y Roberto Holgado denuncia qu'Arturu Bermeyu, Marcos Abel Fernández y Mario Arbesú ""yá nun puen falar como militantes d'Andecha"" porque ""foron suspendíos de militancia na organización"". Según el durísimu comunicáu de la Xunta Executiva, la decisión de suspendelos de militancia tomóse na Xunta Nacional del partíu'l pasáu 3 de xineru y nella pesaron la ""desllealtá ya indisciplina reiterada y probada"" d'estos militantes, a los que s'acusa nel comunicáu de ""intentos d'agresión, venta de llotería paralela, camudu de la pesllera del llar d'Uviéu y bloqueu de la cuenta d'Andecha"" ente otros motivos que xustificaron la suspensión de militancia."