Mieres, camín de la normalización

L’asturianu avanza, pasín a pasín, hacia la normalización en tolos conceyos del país. Esti procesu, sicasí, garra más velocidá en Mieres, onde l’Ayuntamientu emplega l’asturianu en gran parte de la programación institucional, al igual que la mayoría de formaciones polítiques, saliéndose d'esti guión namái'l Partido Popular (PP).

‘Conceyu Mieres’ ye la forma emplegada dende’l Consistoriu en tola cartelería qu’edita, mentes que l’asturianu ye l’idioma nel que s'anuncien les actividaes culturales tolos trimestres nel conceyu, gobernáu nesta llexislatura y l’anterior con mayoría absoluta por Izquierda Xunida (IX) col sofitu d’Izquierda Asturiana (IAS). Tamién de les llones que cuelguen de la Casa Cultura.

L'emplegu del asturianu dase de manera tresversal, emplegándose en munches ocasiones n'Educación, Igualdá o Memoria, dalgo que yá se facía na época del PSOE. L'usu del asturianu ye por parte de tolos partíos, yá que los socialistes fixeron la campaña eleutoral en llingua asturiana y Foro utilízala nos sos comunicaos de prensa, mentes que Somos tamién tien compromisu pa col idioma.

Namái’l PP fraya esi consensu, como amuesa la so oposición a la ordenanza d’asturianu de Mieres, aprobada en Plenu en marzu del 2018 per segunda ocasión depués de que se modificaren dellos aspeutos de la mesma a partir d’alegaciones presentaes polos populares cola fin d’evitar posibles torgues nos tribunales, pero que ta paralizada pola Delegación de Gobiernu Estatal n'Asturies, baxo mandu del PSOE. El siguiente pasu que se pretendía dar dende'l Conceyu yera l’aprobación d’un Plan de Normalización Llingüística qu’ayudara entá más a afitar l’usu del asturianu en Mieres, cola cuestión pendiente primero de dar continuidá mientres tol añu al Serviciu de Normalización Llingüística llocal que permitiría la torna completa de la web municipal.

Mientres, la población recibe de manera positiva estos avances nun conceyu nel que l’idioma tien muncha vitalidá. Un exemplu de la querencia de los mierenses hacia la llingua asturiana ye’l datu d’escolarización na materia en Primaria na rede públicu: un 88,20 por cientu del alumnáu va a clase d’asturianu.