“El mio compromisu foi col presidente Javier Fernández pa estos cuatro años”, afirma Alonso

El conseyeru d’Educación y Cultura nun va siguir nel cargu. “El mio compromisu foi col presidente Javier Fernández pa estos cuatro años”, confirmó Genaro Alonso, que valoró positivamente la so etapa al frente de la conseyería nun actu de depósitu de fondos del Serviciu d’Inspeición Educativa nel Archivu Históricu d'Asturies.

“Él marcha por razones conocíes y obvies, y yo tamién tomé la decisión de marchar con él”, esplicó ayeri, pa darréu destacar “la satisfaición enorme que supunxo pa min trabayar con un presidente como Javier Fernández,  un home de una capacidá inmensa y un talante que casi nun se pue igualar”. Sobre’l balance de la llexislatura apuntó que “llogramos llevar el testigu un palmu más allá, algamando fitos importantes na FP dual; nel conveniu cola Universidá d’Uviéu; na convocatoria d’oposiciones, que foi la más elevada de la historia d’Asturies; y otros llogros de los que me siento particularmente satisfechu tanto yo como l’equipu que m’acompañó nesti periodu. Hai aspeutos, obviamente, que meyorar y completar, pero eso forma parte del procesu y del camín, y espero que’l que me sustituya como titular de la conseyería pueda facer lo mesmo y llevar el testigu unos palmos más allá”.

La trayeutoria d’Alonso nestos cuatro años destacó pol so apueste pol asturianu, avanzando nel procesu de recuperación toponímica, poniendo en marcha’l Plan Pilotu esperimental de Promoción del Usu del Asturianu en cuartu de Primaria en seis centros d'otres tantes poblaciones del país y aprobando’l decretu qu'afita los niveles de competencia nel usu de la llingua asturiana y que regula les pruebes de certificación correspondientes adaptaes al Marcu Común Européu de Referencia pa les Llingües. Nel debe, la paralización de la creación de la especialidá docente de Llingua Asturiana y Gallego-asturiano pola falta d’entendimientu col Ministeriu d’Educación tanto col PP como col PSOE al frente.

Documentación treslladada en cerca de 2.500 caxes

Alonso fixo estes declaraciones nun actu de presentación formal del depósitu que’l Serviciu d’Inspeición Educativa fixo de documentación académica nel Archivu Históricu d’Asturies “pa la so custodia y pa ponela a disposición de los investigadores; pa que tea en bones manes”, apuntó’l conseyeru. Esta información “importante” abarca más d’un sieglu y “recueye información académica, d’alumnos de colexios públicos, privaos y concertaos, y d’etapes educatives que too esti tiempu sufrió’l sistema educativu”, con “datos mui relevantes referíes al alumnáu, al profesoráu y a los centros educativos, y al entramáu del sistema educativu” en llibros d’escolaridá, calificaciones y espedientes  repartíos en cerca de 2.500 caxes.

Na semeya, Concepción Paredes, direutora del Archivu Históricu d'Asturies; Dolores Guerra, xefa del Serviciu d'Inspeición Educativa de la Conseyería d'Educación y Cultura; y Alonso.