Gustavo Bueno diz que “la llingua nun existe”

"El profesor eméritu de filosofía de la Universidá d'Uviéu Gustavo Bueno declaró esta mañana n'Uviéu que l'asturianu ye ""un modismu del español"" y que ""nun existe"". El profesor fexo estes declaraciones na presentación de la ""Fundación DENAES pa la Defensa de la Nación Española"" nel qu'acompañó al representante de la entidá n'Asturies Joaquín Santiago.

El filósofu nacíu en La Rioja definió l'español como la ""lingua natal"" de los asturianos y esplicó qu'elli mesmu viniere nel so día a Asturies porque la consideraba ""la cuna del español"". Al paecer de Bueno, que se declaró contrariu a la oficialidá, ""los partidarios de la llingua"" consiguieron ""meté-y un gol"" a la sociedá cuando llograron que se camudare'l términu ""bable"" pol de ""asturianu"" dalgo qu'asegura que ""permitió un mayor acercamientu a les sos teoríes"". Pa Gustavo Bueno ""si la nación pierde l'idioma común, descompónse"", dalgo que dixo que tá pasando n'España"".

Ente los oxetivos polos que va mirar la Fundación DENAES anuncióse que va tar la ""vixilancia"" de la enseñanza nes escueles ""pa que los neños se formen adecuadamente nel so idioma"". Gustavo Bueno aprovechó la ocasión pa protestar por una tarxeta de visita del conseyeru Javier García Valledor, qu'enseñó a los asistentes a la rueda de prensa ensin mencionar el nome del titular de Xusticia y Rellaciones Esteriores. Bueno esplicó que'l cargu del Conseyeru venía n'asturianu, inglés y francés pero non n'español, dalgo que definió como ""claru ataque a la llingua de toos""."