La Xunta Executiva d’Andecha Astur denuncia “l’intentu de secuestru de la organización” por parte d’un grupu de militantes

"La Xunta Executiva de la organización política nacionalista Andecha Astur ta repartiendo ente la so militancia una carta que tamién fizo llegar a la redacción d'Asturies.com na que denuncia ""l'intentu de secuestru de la organización por parte de dellos militantes"" encabezaos por Arturu Bermeyu a los qu'acusa de rexistrar nel Rexistru de Partíos Políticos una Xunta Executiva distinta de la que s'escoyó nel últimu conceyu nacional y qu'encabezaba Germán Abad como secretariu d'organización con Roberto Holgado de coordinador. Puestos en contactu dende Asturies.com con Arturu Bermeyu, esti comentó que la situación actual permite falar de la existencia de ""dos Andecha Astur"" y esplicó que ""va ser la xusticia quien aclarie cual de les dos partes lleva razón"".

La carta unviada a la militancia del partíu acusa a esti grupu de persones, encabezaes por Arturu Bermeyu, que figuraría como secretariu de la Xunta Xeneral escoyida illegalmente, de ser ""incapaces d'asumir el resultaú democráticu de los órganos d'Andecha"" y de ""intentar al traviés del golpismu, la imposición y la corrupción apropiase illexítimamente del destín d'Andecha Astur"". La Xunta Executiva d'AA acusa a esti grupu d'aplicar ""métodos facistes"" considerando ""la organización como patrimoniu personal"" y de ser ""incapaces de convivir nuna organización con pluralidá interna, discrepancia, y democracia"".

El procesu pol que se llegó a esta situación ye abegosu enforma. Según la versión de la Xunta Executiva, el grupu d'Arturu Bermeyu, nel que tamién figuren otros miltantes como Marcos Abel Fernández Marqués o'l representante de les mocedaes del partíu, Darréu, Mariu Arbesú, rexistró énte notariu ""un acta nel que se recueye un Conceyu Nacional qu'escoyó a esta executiva el día 9 d'avientu de 2006"". La Xunta Nacional de la organización afirma que nun hebo tala convocatoria de Conceyu Nacional nesa fecha y que se trata polo tanto d'una ""falsificación llevada énte'l rexistru de partíos políticos"". Darréu del rexistru d'esta acta, la Xunta Nacional esplica como'l grupu de militantes opuestos a la Xunta Nacional dio anuncia, al traviés de la prensa escrito, d'un nuevu Conceyu Nacional con vocáu pal mes de febreru, un alcuentru qu'asegura que se celebra ""ensín que ningún órganu de la organización lo convocare y poro, ensín nenguna llexitimidá"".

La Xunta Executiva albidra tres d'estos movimientos un intentu de ""impedir qu'Andecha pueda presentase a les elecciones"" y afirma que salió escoyida de Candás col 90% de los votos y afítase como ""escoyeta democrática de les bases d'Andecha Astur"" contra la ""imposición"" del grupu qu'encabezaría Bermeyu y píde-yos a los militantes ""pol futuru de la nuesa organización"" que ""defendan a Andecha Astur de los ataques del facismu y la corrupción"" poniéndose en contactu cola Executiva llexítima ""cola fin d'aisllar política y socialmente a estes persones y desterrales del nuestru proyeutu políticu"".

Puestos en contactu dende Asturies.com con Arturu Bermeyu, esti comentó que la situación actual permite falar de la existencia de ""dos Andecha Astur"" y esplicó que ""va ser la xusticia quien aclarie cual de les dos partes lleva razón"". Bermeyu esplicó como se ""nomó a espaldes míes"" a Lali García Rubiera como nueva secretaria xeneral, saltándose, al paecer de Bermeyu, l'asamblearismu pol que se manda la organización y cometiendo irregularidaes ayenes al procesu democráticu normal. Bermeyu precisó que la convocatoria a Conceyu Nacional prevista pal 24 de febreru faise precísamente cola intención d'aclariar cuanto primero posible la situación y poder presentase a les elecciones. Como tresfondu ideolóxicu de la cuestión, Arturu Bermeyu identifica nel sector opuestu qu'hai ""una parte que quier cambiar Andecha y dexar el nacionalismu p'arrimase al asturianismu y otra parte que quier directamente que'l partíu desapaeza y nun llegue a presentase a les elecciones."" Bermeyu esplicó finalmente que ye difícil determinar el grau de representatividá de cada corriente y definió que la polémica como una ""cuestión esclusiva de dos grupos enfrentaos a la que ye ayena la mayor parte de la militancia de la organización""."