El Conseyu de Gobiernu aprueba'l decretu d'acreitación de les pruebes de conocencia

Tán adaptaes al Marcu Común Européu de Referencia pa les Llingües en cinco niveles.

El Conseyu de Gobiernu d'esta mañana aprobó, tres el so pasu por información pública en dos ocasiones, al tener qu'iguar un error nel testu, el decretu qu'afita los niveles de competencia nel usu de la llingua asturiana y que regula les pruebes de certificación correspondientes. En concreto, habrá certificaos nos niveles básicu A1, básicu A2, intermediu B1, intermediu B2 y avanzáu C1.

Esta normativa desarrolla la Llei d'Usu y Promoción del Bable/Asturianu, que nel so artículu 11 dispón que'l Gobiernu afitará les certificaciones qu'acreiten el conocimientu d'esta llingua. Cola so entrada en vigor, la ciudadanía podrá demostrar el so nivel competencial mediante pruebes específiques que serán iguales en tol país y constarán de cinco esámenes: comprensión de testos orales, comprensión de testos escritos, producción y coproducción de testos orales, producción y coproducción de testos escritos, y mediación.

Los títulos que s'algamen podrán ser valoraos nos procesos de reconocimientu de méritos que se xestionen por parte l'Alministración. Otra manera, el decretu aprobáu güei tamién prevé la ellaboración del proyeutu que regulará los niveles de competencia nel usu del gallego-asturiano asina como les correspondientes pruebes de certificación que confirmara'l Gobiernu n'avientu tres los pidimientos d’autoridaes y coleutivos del occidente del país, asina como de l’Academia de la Llingua Asturiana.

Na imaxe, un momentu de la reunión del Conseyu de Gobiernu. Semeya obra d'Armando Álvarez.