IX reclama un plan de movilidá sostenible que se tenga nel ferrocarril

"El coordinador d'Izquierda Xunida d'Asturies, Jesús Iglesias dio ayeri una rueda de prensa na que la so formación pidió la creación n'Asturies d'un ""plan de movilidá sostenible"" que fomente l'usu del tren, mediu que dixo que tien de convertise en ""central"" pa l'articulación de los servicios intermodales del tresporte n'Asturies"".

Acompañáu pol máximu representante del sindicatu CC.OO na empresa ferroviaria FEVE Oscar Sainz, Iglesias declaró qu'esti plan que propón IX ha inxerise nel ""instrumentu"" estatal del Plan Estratéxicu d'Infraestructures y Tresporte (PEIT). Tocante a los conteníos del plan, Iglesias esplicó qu'ha concretar les inversiones con compromisos de financiación estatal y qu'ha asegurase la titularidá pública de los operadores ferroviarios. Dientro de la propuesta d'IX, el ""tren-tranvía"" que defenden los socialistes asturianos pa les cuenques mineres concasaría perfectamente, pero ""con midíes reales, non como una etiqueta"". Iglesias y Sainz sorrayaron que pa treslladar a la realidá esa iniciativa del tren-tran ye imprescindible la participación de FEVE, empresa que tien n'Asturies una plantiya de más de 1.000 persones.

L'executivu asturianu presentare va poco'l proyectu de primer llinia de tren-tranvía, que partiría de l'actual llinia de FEVE na cuenca del Nalón ente Llangréu y Llaviana. El Conseyeru d'Ordenación del Territoriu Francisco González Buendía dio anuncia d'una segunda llinia ente Uviéu, Siero y Llanera y un ramal nuevu dafechu pa conectar l'Aeropuertu d'Asturies son los primeros proyectos en que se trabaya. La idea nun tien el preste unánime de tolos sectores sociales implicaos, y asina los sindicatos CC.OO y UXT refugaron el mes pasáu nuna rueda de prensa conxunta la idea del tren-tranvía pa la Cuenca del Nalón por abultá-yos que diba dir más despacio que l'actual serviciu de FEVE, pal que pidieron que se duplicare la llinia col envís de que puea dar más frecuencia de trenes. El PP asturianu tamién se marcó en contra d'esti tren-tranvía, que calificó de ""barrera ferroviaria"". La mesma Izquierda Xunida reaccionó de mano con rocea a la propuesta del tren-tranvía, que vieno presentada por dirixentes socialistes. Representantes nes cuenques de la coalición d'izquierdes calificaren la idea del ""tren-tran"" d'etiqueta vacia de conteníos."