IAS denuncia les polítiques de vivienda del Gobiernu asturianu

"Dempués de les declaraciones que fexere ayeri la Conseyera de Vivienda Laura González refugando l'aplicación, a lo menos de momentu, de midíes como les tases a los pisos vacios que se lleven alantre en Cataluña y Euskadi, la formación política Izquierda Asturiana (IAS) emitió un comunicáu en que denuncia que ""la política de vivienda del gobiernu autonómicu ye un fracasu"" y que ""vive a remolque y ensin solución pal problema de les viviendes vacies"".

IAS repercute los datos presentaos pol sindicatu CC.OO. que falen de la existencia de más de 76.000 cases y pisos vacios n'Asturies nun contestu de xuba descomanada del preciu de la vivienda, que foi del115% ente 1996 y 2005. Al paecer d'IAS, les polítiques de construcción de vivienda nuevo nun paez qu'ayuden a menguar el preciu y al traviés d'elles llévense alantre inxusticies como les ""espropiaciones humillantes"" pa los habitantes de la zona rural de Xixón. El candidatu d'IAS a les elecciones autonómiques del mes de mayu Ignaciu Llope comentó al respective que ""les polítiques desarrollaes pol gobiernu asturianu de coalición demuestren otra vegada más que nun s'estremen de les que facía'l PSOE en solitario"".

Llope manifestó que ""Mientres n'otres comunidaes autónomes casu de Cataluña o'l País Vascu s'apuesta por polítiques que movilicen el parque de viviendes desocupaes, equí alcontrámonos énte un Plan Asturianu de Vivienda 2006-2008 que caltién l'aueste pol modelu tradicional d'incentivar con ayudes a los que, en munches ocasiones, nun precisen d'ello, siguiendo con ello mangaos na fola especulativa"". Llope llamenta ""que se venda como un trunfu "" dende l'executivu'l que la xuba de los precios de la vivienda fuere del 9% cuando los salarios namás xubieron el 3,3%. El candidatu electoral d'IAS califica de ""cobarde"" la política del executivu asturianu porque nun s'enfrenta a la especulación, y carga especialmente contra Izquierda Xunida, qu'afirma que n'otres comunidaes participa activamente en polítiques de vivienda d'izquierda mientres que n'Asturies la coalición vive un procesu de ""derechización y PSOEización""."