La Plataforma pola Defensa de Redes tamién refuga un embalse menguáu en Caliao

"Dempués de les declaraciones que fexere'l pasáu día 7 de xineru'l Conseyeru Francisco González Buendía nes qu'adelantó que'l Gobiernu asturianu estudiaba un replateamientu del polémicu embalse de Caliao (Casu), la Plataforma pola Defensa de Redes, qu'encabeza la oposición al embalse, decidió na so última reunión celebrada'l pasáu fin de selmana, declarar el planteamientu del cargu del Principáu como ""inaceptable"" en cuantes queye siguir ""aporfiando na política hidraulista que quier incrementar la ufierta d'agua al traviés de grandes infraestructures""

Contra les polítiques que se tienen en apurrir más ufierta d'agua a los usuarios y que tienen nel embalse'l so exemplu más claru, la Plataforma camienta preciso defender polítiques d'aforru d'agua, dalgo qu'afirma que nun se ta faciendo n'Asturies. La Plataforma recuerda nesti sentíu como CADASA tardó 6 meses n'unviar una propuesta a los conceyos asturianos pa qu'entamaren polítiques d'aforru d'agua. Amás de pidir midíes nel ámbitu domésticu y tamién nel industrial, onde diz que munches empreses tan gastando agua de la traida, de calidá superior, ensin tener falta d'ello, la plataforma recuerda que ye preciso atayar les perdes d'agua na rede de distribución. Tamién se marca la plataforma en contra de les urbanizaciones na costa y el turismu masivu, dambos ""grandes consumidores d'agua qu'han desaniciase del nuestru territoriu"".

Mientres nun echen a andar ""estes y otres midíes"" la Plataforma afirma que nun tien xacíu falar d'embalse, y opónse lo mesmo a la obra en Caliao qu'a otres como'l tresvase del Navia, polo que pide una moratoria na construcción de grandes infraestructures hidráuliques y l'apertura d'un debate sobre la xestión del agua n'Asturies que permita alcanzar ""un conocimientu fondu de la de nuestra realidá nesta materia"" y que lleve a la redacción d'un Plan Hidrolóxicu de Cuenca.

Más información nel weblog de la plataforma"