Iniciativa llama a alcaldes y conceyales a prometer el so cargu n’asturianu

Esti sábadu 78 alcaldes y 928 conceyales van prometer o xurar el so cargu, según la fórmula qu’escueyan. Iniciativa pol Asturianu afala a estos cargos públicos a qu’empleguen l’idioma pa “normalizar l’asturianu nun actu solemne” como ye'l plenu de constitución.

“Esta llexislatura, agora que’l compromisu cola oficialidá del asturianu tien más sofitu políticu que nunca nes instituciones como acreiten los resultaos del 26 de mayu, ye un bon momentu pa poner en práctica una de les ferramientes más útiles y más cencielles de da-y promoción al idioma, usala de forma normal ente los y les representantes públicos”, apunten dende la organización cívica. Pa ello, ufren asesoramientu llingüísticu a tolos alcaldes y conceyales interesaos n’emplegar tanto la llingua asturiana como’l gallego-asturiano nos plenos convocaos el 15 de xunu.

D’igual forma, encamienten a qu’esti pasu nun quede nun xestu, sinón que tien d’acompañase “dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, recuperar y oficializar la toponimia tradicional, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques que-y dean presencia al asturianu en tolos ámbitos de la xestión de los conceyos”. Próximamente, Iniciativa pol Asturianu va asoleyar un documentu  con una montonera de propuestes mui concretes pa desarrollar dientro d’estos cuatro años dende los ayuntamientos y que permitiríen dir avanzando na normalización social del asturianu.