Cultura cuenta con abrir el centru de la prehistoria de Teberga pa últimos de marzu

La Conseyería de Cultura cuenta con abrir pal próximu día 23 de marzu'l Parque de la Prehistoria de Teberga, según dio anuncia ayeri Ana Rosa Migoya, que confirmó que l'equipamientu cultural va tar abiertu, en cualquier casu, pa enantes de la selmana santa.

Comprometíu pol Presidente asturianu pal añu 2006, el Parque de la Prehistoria de Teberga cuenta con un presupuestu alredor de los 10 millones d'euros con cargu a los fondos mineros. Nel so interior, el muséu de Teberga va contar con una cueva subterránea con recreaciones de delles de les cueves más importantes del paleolíticu européu incluyendo amás unes doscientes reproducciones d'arte prehistóricu de tol mundu. Ente elles, nel edificiu del equipamientu cultural yá tán puestes les de les cueves franceses de Lascaux y Niaux, la cántabra d'Altamira y les asturianes del Pozu'l Ramu y Llonín. El caderalgu Javier Fortea ta al frente del equipu encargáu de facer los conteníos d'esti centru, del que forman parte tamién el caderalgu de la Universidá de Cantabria Manuel González Morales, el que fuere conservador xeneral del patrimoniu de Francia Jean Clottes y el profesor de prehistoria Marco de la Rasilla, amás del especialista Jesús Altuna.

Teberga va contar asina con un equipamientu cultural que va resumir la prehistoria continental nun conceyu onde nun hai prácticamente afayos arqueolóxicos de nenguna de les dómines antigües de la prehistoria, asitiándose l'aniciu de la presencia humana en Teberga a lo cabero del neolíticu y siendo lo más importante ente'l conxuntu patrimonial del conceyu d'estes dómines los restos de Fresnéu, de la edá del bronce.