Morrió'l periodista Ryszard Kapuscinski, premiu Príncipe d'Asturies d'Humanidaes

"El periodista polacu Ryszard Kapuscinski, premiu ""Príncipe d'Asturies"" d'humanidaes nel añu 2003, morrió ayeri en Varsovia a los 74 años dempués de pasar una operación de corazón. Kapuscinski foi una de les principales figures del periodismu del sieglu XX, escribiendo les cróniques, según les sos propies cuentes, de 12 guerres y 27 revoluciones.

Nacíu en 1932 y llicenciáu n'Historia, Kapuscinski entamó a trabayar de periodista con 17 años, faciéndose un nome como reporteru de l'axencia polaca ""PAP"" pa la que trabayó 30 años, los más d'ellos n'África. Tocó-y escribir les cróniques de la descolonización y la independencia de los países d'esti continente y tamién el güelpe d'estáu de Pinochet o la revolución relixosa iraní. A partir de los 80, la so carrera abrióse a publicaciones internacionales, casu de Time, The New York Times o l'alemán Frankfurter Allgemeine. Defensor de la so independencia de criteriu, Kapuscinski tuvo cuatro vegaes condenáu a muerte. La so esperiencia vital y profesional recuéyese en bien de llibros, dellos abondo populares, casu de ""Ébano"", estoyu de testos sobre África, ""L'imperiu"" sobre'l bloque soviéticu o ""La guerra del fútbol"" sobre la guerra ente Honduras y El Salvador."