30 alumnos aprenden gaita nos conservatorios d'Uviéu y Xixón

"El Conseyeru d'Educación José Luis Iglesias Riopedre participó esta mañana n'Uviéu xunto cola directora del Conservatoriu Profesional de Xixón, Julia Alvarez González, y el director del Conservatoriu Profesional d'Uviéu, Manuel Fernández Avello, na presentación de los estudios oficiales de gaita qu'entamaron el pasáu mes de setiembre nos conservatorios d'Uviéu y Xixón. En total son 30 alumnos los qu'estudien l'instrumentu asturianu. Hasta agora los cursos centráronse nes materies que son tueru de los estudios oficiales de conservatoriu, casu de l'armonía o historia de la música, siendo esta selmana qu'entamaron les clases específiques de gaita.

Riopedre esplicó qu'actualmente hai cerca de 1.560 persones estudiando gaita n'Asturies al traviés de 24 escueles de música, 4 escueles de danza y 30 asociaciones culturales, unos datos qu'amuesen la popularidá del instrumentu qu'agora ""amás de tener reconocimientu como instrumentu tradicional, entra tamién nel ámbitu académicu, dalgo que va valir pa ""impulsar l'instrumentu y a los mesmos gaiteros"" en palabres del conseyeru.

El Conseyeru d'Educación sorrayó que'l currículum de gaita lleva a una titulación como la del restu de los instrumentos o especialidaes de los conservatorios. El plan d'estudios consiste nún grau elemental de 4 cursos, que se ponen en Xixón. Dientro d'esti plan alcuéntrense asignatures como la de gaita, gaita de conxuntu, coru y llinguaxe musical, ente otres. Respective al grau profesional, pal que se ponen les clases en conservatoriu d'Uviéu, consta de seis cursos nos que se ponen asignatures como la d'acompañamientu al pianu o fundamentos de composición.

Según esplicó Riopedre, hai trés profesores, dos n'Uviéu y ún en Xixón que van ser los encargaos de poner les clases pel momentu. El responsable d'Educación sorrayó qu'Asturies pasa a ser, xunto con Galicia, País Vascu, Cataluña y Andalucía, una de les comunidaes que tien reglaos los estudios del so instrumentu tradicional."