L'arqueoloxía centra una charra del taller d'historia de Corvera

Nicolás Alonso va falar sobre 'L’arqueoloxía de la dómina moderna n’Asturies' en Les Vegues.

El convidáu de güei al taller 'Una entruga pa cada historia. Asturies del sieglu XV al sieglu XVIII', qu’entama la Casa de la Llingua del Conceyu de Corvera, va averar a les y los asistentes a l’arqueoloxía medieval y moderna, ufriendo un estáu de la cuestión actualizáu onde va centrase nes llinies d’investigación abiertes anguaño. Arqueólogu profesional, llicenciáu n’Historia y espertu universitariu en xestión y conservación del patrimoniu pola Universidá d’Uviéu, ente les sos llinies d’investigación alcuéntrense los estudios de territoriu costeru y l’arqueoloxía de los paisaxes históricos portuarios d’Asturies, sobre manera, anque tamién trabaya nel ámbitu de l’arqueoloxía urbana de cronoloxía medieval y moderna y nel de l’arqueoloxía de la Guerra Civil.

Direutor de les escavaciones arqueolóxiques en Bañugues (Gozón), Alonso trabayó tamién nos años últimos na escavación del Castiellu de Gauzón mesmo que n’escavaciones de control y siguimientu d’obres públiques y privaes. La so charra en Corvera va tener llugar nel aula 2 de Centru Sociocultural de Les Vegues esta tarde a les 18 hores, con entrada llibre.

Na semeya, Llumeres (Bañugues).