L’asturianu suma votos

Los diputaos dispuestos a la oficialidá del asturianu o a trabayar por un consensu pa la so declaración medraron esti 26-M, pasando de los 17 del 2015 a los 28 actuales. La incorporación d’esti puntu nel programa de la FSA confirmó que l’asturianu nun resta votos: los socialistes aumentaron de 14 a 20 representantes.

La campaña agresiva liderada pol PP y VOX, a la que se sumó nos díes últimos Ciudadanos, nun resultó beneficiosa pa les dos principales formaciones conservadores. Los primeros siguen liderando la oposición, con un diputáu menos qu’hasta agora –pasen de 11 a 10–, mentes que Juan Vázquez quedó mui lloñe de tener el papel decisivu col que contaba al sumar 5 escaños, 2 más qu’hai 4 años.

La ultraderecha entra na Cámara con 2 representantes, los mesmos que Foro, partíu que nun escarta la oficialidá nel so programa anque considera que nun esiste un consensu anguaño, pero comprométese a trabayar pol mesmu “na defensa de les llingües d’Asturies, respetando la llibertá y la voluntariedá del so usu ensin imposiciones pero tamién ensin impedimentos pa los ciudadanos”. La candidatura liderara por Carmen Moriyón pierde un diputáu con respeuto al 2015, pudiéndo-y pesar la so apaición na nomada ‘semeya de Colón’, anque caltién una representación que les encuestes poníen-y en dulda.

17 diputaos contrarios

El consensu del que fala Foro y tamién la FSA, con una redaición más esplícita que los foristes, sí que paez dase echando una güeyada al arcu parllamentariu nuevu. 28 de los 45 diputaos seríen favoratibles a meyorar l'estatus xurídicu del asturianu, por 17 de los que s’oponen dafechu, cuando la reforma del Estatutu d'Autonomía precisa 27 diputaos.

Una de les duldes d'esta llexislatura qu'entama ye si Foro va plantegase afitar el so proyeutu de calter asturianu y avanzar nel reconocimientu de los derechos llingüísticos; ello sumaría 28 diputaos, ún más de los 27 necesarios, que nun sumen anguaño PSOE, IX-IAS y Podemos, al quedar en 26.  Nel casu de VOX, esta formación ye más radical y refuga la Llei d'Usu y la mesma esistencia de l'Academia de la Llingua Asturiana, y pela parte del PP ta por ver si va volver a les sos posiciones tradicionales de defensa de la norma que regula anguaño l'idioma o va siguir compitiendo cola ultraderecha afondando nel discursu radical contra l'asturianu de los caberos dos años.

Sicasí, anque la oficialidá ye difícil que salga alantre nesta llexislatura daes les postures actuales dientro de Foro, la dinámica ye que los apoyos al idioma siguen medrando eleición a eleición, confirmando que l’asturianu nun resta, sinón que suma votos. Per delantre queden cuatro años pa siguir poniendo les bases d’un futuru pal idioma.

Na semeya, Adrián Barbón, futuru presidente d'Asturies, esti mes nel Teatru Campoamor xunto con compañeros del partíu tres la xunta estraordinaria de l'Academia de la Llingua Asturiana con motivu del XL Día de les Lletres Asturianes.