CC.OO. píde-y al Principáu que faiga una política de vivienda acordies col altu númberu de viviendes vacies

"El sindicatu Comisiones Obreres (CC.OO.) solicitó-y esta mañana al Gobiernu del Principáu d'Asturies una política de vivienda en consecuencia al altu númberu de viviendes vacies qu'esisten n'Asturies, un númberu que, acordies colos datos del sindicatu, dobla con muncho al númberu de viviendes públiques que s'estima que van precisase d'equí al 2017.

CCOO d'Asturies asegura que na comunidá autónoma hai un censu de 72.640 viviendes desocupaes ente les que tán disponibles pa la venta o alquiler o, cenciellamente abandonaes. Esta cantidá supón, según CCOO, el 13,9% del parque de viviendes de la comunidá. La central sindical afirma qu'esti parque de viviendes, de salir al mercáu, daría pa cubrir toles espectatives de necesidá de vivienda n'Asturies d'equí al 2017,que se periten ente 23.000 y 29.000 viviendes.

L'informe del sindicatu conseña que'l 79,2% d'estes viviendes vacies, cerca de 57.500, presenten un bon estáu de conservación, y que d'elles 28.000 alcuéntrense nos conceyos d'Uviéu, Xixón y Avilés, conceyos onde hai mayor demanda. Pa los responsables de la secretaría de Política Social de CC.OO. rexístrase amás una tendencia a que cada añu haya más viviendes vacies n'Asturies, siendo que la cantidá de les mesmes xubió'l 20% ente'l 1991 y el 2001.

La responsable de Secretaría de Política Social de CC.OO. Angeles Alegre resumió la situación esplicando que ""nun se pue siguir construyendo en función de los intereses particulares de determinaos empresarios y de dellos conceyos, hai que facelo teniendo en cuenta les necesidaes reales de la población asturiana y la so capacidá alquisitiva"". En consecuencia, CC.OO. empondera como daqué positivo les midíes que s'espeyen en Plan Asturianu de Vivienda 2006-2008 p'aprovechar el parque residencial yá existente y pa fomentar l'alquiler de vivienda desocupao, anque-y abulta que son ""midíes insuficientes""."