Foro nun ve'l consensu necesariu pa la oficialidá

Afita nel so programa eleutoral que trabayará por algamar ún social y políticu ampliu "na defensa de les llingües d'Asturies".

Na estaya 'Cultura' Foro señala que "anguaño nun esiste'l consensu social necesariu qu'aconseye la reforma del nuesu Estatutu d'Autonomía pa incluyir nel so artículu 4 la oficialidá, tal como se recueye nel artículu 3.2 de la Constitución española". El so compromisu nesi sen ye, al igual que nel 2015, trabayar “por un consensu social y políticu ampliu na defensa de les llingües d’Asturies, respetando la llibertá y la voluntariedá del so usu ensin imposiciones pero tamién ensin impedimentos pa los ciudadanos”, centrándose esta llexislatura namái nel desarrollu reglamentariu "de la Llei 1/1998, de 23 de marzu, d'Usu y Promoción del Bable/Asturianu".

D'igual forma comprométese a contribuyir "a la normalización llingüística en toles esferes de la sociedá asturiana favoreciendo la presencia de nueses llingües na enseñanza, na toponimia y nos medios de comunicación", y a cumplir "les lleis y disposiciones de la Xunión Europea en materia de defensa de derechos llingüísticos".

Na semeya, Carmen Moriyón, candidata de Foro a la presidencia d'Asturies.