Los historiadores del arte denuncien la so esclusión del Conseyu de Patrimoniu d’Asturies

"Un grupu profesores de la facultá d'Historia del Arte d'Uviéu protestaron pola ausencia de representantes d'esta rama del saber nel Conseyu de Patrimoniu d'Asturies, esixendo-y a la Conseyería de Cultura qu'acabe cola situación actual, que camienten que tien que ver cola so independencia de criteriu, que pue ser molesta pa les autoridaes.

Ello ye que Cultura, n'acabando'l plazu llegal en qu'ocuparon estos puestos en Conseyu de Patrimoniu los profesores Soledad Álvarez y Javier Santos, nomó representantes nuevos en sustitución d'ellos que nun tienen titulación n'Historia del Arte. Los profesores de la Universidá d'Uviéu camienten que la presencia de representantes de la so especialidá ye imprescindible nun organismu que, como máxima entidá rellacionada col patrimoniu cultural asturianu, decide en cuestiones como l'inxerimientu d'espedientes de declaración de Bien d'Interés Cultural y que s'encarga de les polítiques de caltenimientu d'esi patrimoniu.

Soledad Álvarez afirmó qu'hai bien de llicenciaos na especialidá que podríen cubrir esos puestos y llamentó que la independencia de criteriu de los historiadores del arte, que namás se manden pol interés en caltener el patrimoniu históricu, independientemente d'otros condicionantes económicos o políticos, siente mal en Cultura.

Les tensiones ente los historiadores y la Conseyería yá vienen de va tiempu, votando nel so día los historiadores en contra de cuestiones como la descatalogación del Castru de Cellagú. L'enfrentamientu yá nun tuvo torna cuando tocó votar el Plan d'Ordenación Urbana d'Avilés, cuestión na que la conseyera de Cultura Ana Rosa Migoya impuso'l so su criteriu como presidenta penriba del de los historiadores."