La esposición 'Voces' aporta a la Universidá

Instálase na Facultá de Filosofía y Lletres.

Dende güei, y hasta'l 14 de xunetu, la esposición itinerante ‘Voces. La llingua n’Asturies al traviés de los sieglos’ va poder visitase na Universidá d'Uviéu. Fecha pa estrenase nel Muséu Arqueolóxicu d'Asturies dientro del programa 'Cuadonga Centenarios', yá visitó'l conceyu de Cabranes y ta confirmada la so presencia en Cangas del Narcea mientres la celebración de la Universidá Asturiana de Branu (UABRA).

L'amuesa, formada por paneles triangulares que cuenten la historia cultural y social d'Asturies al traviés del llinguaxe y dellos materiales, pue visitase nel pisu primeru de la facultá asitiada nel campus del Milán de la Universidá d'Uviéu, nel pasiellu del Departamentu de Filoloxía Románica. El coordinador científicu de 'Voces' ye’l profesor Xulio Viejo Fernández, y xunto con elli son responsables de los conteníos espositivos los profesores Ramón d’Andrés y Roberto González-Quevedo, mentes que'l diseñu y la maquetación foron frutu del trabayu de Juan Hernaz.

Esta mañana inauguróse la esposición cola asistencia d’autoridaes universitaries y del direutor xeneral de Planificación Llingüística y Normalización, Fernando Padilla. La entrada pa visitar 'Voces' ye llibre pa cualesquier visitante.