Trunfu de la estrema derecha en Serbia

El Partíu Radical, d'ideoloxía ultraderechista, foi'l ganador de les elecciones que se celebraron ayeri en Serbia . Con dalgo más del 28% de les papeletes, esta formación nun s'allega a la mayoría y nun va poder formar gobiernu, dalgo que sí podríen facer la segunda y tercer formación con más votos, el Partíu Demócrata, y el Partíu Democráticu de Sérbia.

Les elecciones d'ayeri foron les primeres en Serbia que se celebraron tres de la muerte del ex - presidente Milosevic, protagonista del procesu de descomposición de l'antigua Yugoslavia, y dempués de que la república de Montenegro declarare oficialmente la so independencia'l pasáu mes de mayu del 2006. El trunfu del partíu radical serbiu supón un grave enzancu nes negociaciones pa la entrada de Serbia na Unión Europea y tienen llugar cuando falta una selmana pa que la ONU faiga públicu'l so determín pal futuru estatutu políticu de la rexón de Kosovo.

Nel añu 2006 entamaron los contactos pa decidir el futuru políticu d'esti teritoriu del que la OTAN forzó a Serbia con un ataque militar a retirase nel añu 199. Kosovo, con una estensión asemeyada a la d'Asturies y con una población de cerca de 2 millones d'habitantes, alcuéntrase dende entós nún estáu d'indefinición política como provincia autónoma baxo mandatu de la ONU. La solución pa Kosovo, aplazada yá delles vegaes, pasa por ser un Estáu independiente o por amestase como provincia en Serbia o n'Albania. La constitución Serbia, aprobada'l pasáu mes d'ochobre, define a Kosovo como una provincia serbia, negándo-y el derechu a la independencia, dalgo que supón un nuevu pilancu nes negociaciones pol so futuru.