El Sporting de Xixón enriestró la tercer derrota

"El Sporting de Xixón amestó en campu del Xerez la so tercera derrota siguía pol resultáu de 3 a 1, un marcador negativu col que naide contaba cuando s'adelantó nel marcador l'equipu asturianu nel minutu 23 en medio d'una riestra de bones oportunidaes pal conxuntu qu'entrena Manuel Preciado.

El sporting volvía ayeri a una alliniación teóricamente ganadora, dexando l'entrenador en casa a Chus Bravo y Omar. De fechu, l'equipu asturianu aguantó mui bien l'emburrión que diere de mano'l Xerez, un equipu que llegaba al partíu enriestrando siete alcuentros ensin conocer el trunfu. Congo pal Sporting y Medina y Aguilar pal Xerez punxeron les primeres ocasiones clares, pero foi Barral, tresformando un llibre indirectu dientro del área del Xerez, el qu'abrió'l marcador. Nun partíu rápidu y abiertu, los asturianos tuvieron delles ocasiones clares tres del gol, ente elles un balón que'l porteru del Xerez tuvo que disviar sobre los mesmos palos, y una xugada na que l'arbitru cortó por Orsai que nun yera una contra rapidísima de Congo.

A puntu de dir pal descansu, un balón mal rechazáu pol Sporting supunxo l'empate, marcáu por Arruabarena. El gol del Xerez llegaba cuando más mancaba, pa que na segunda parte, Pedro Ríos adelantare a los locales nuna xugada en que tola defensa del Sporting quedó n'evidencia. El Sporting nun se dio y buscó, anque yá ensin fuelgu, la portería del Xerez. Unes manes dientro del área de Barral supunxeron el penalti del 3-1 y la espulsión del meyor del Sporting de Xixón nel día d'ayeri. Nun hebo tiempu pa más."