La Figar, Ca Sanchu y Tierra de Tinéu, ganadores nel certame del Afuega’l Pitu

"La Foz de Morcín foi ayeri l'escenariu del 27 certame del quesu d'Afuega'l Pitu, nel que resultaron ganadores les queseríes Tierra de Tinéu n'atroncáu y Ca Sanchu de Grau ganó en roxu de trapu. La Figar, una quesería nueva de Grau llogró'l reconocimientu al meyor blancu de trapu. Al concursu, qu'entama dende va 27 años la Hermandá de la Probe de La Foz, presentáronse un total de diez ellaboradores d'esti quesu, que punxeron a vender un total d'ocho mil quesos de toles variedaes.

La conseyera de Mediu Rural acudió al festival y dio anuncia de que'l quesu Casín y el choscu de Tinéu tán yá a piques de llograr la denominación d'orixe , que ""namás depende de dellos papeleos en Madrid"". Otra de les novedaes que s'anunciaron foi la de la inauguración del Muséu de la Llechería de La Foz, que s'aseguró que va tar abiertu pal añu qu'entra.

L'afuega'l pitu, que taba a primeros de los 80 nun procesu de decadencia que lu llendaba al círculu del consumu na redolada más allegada a los conceyos del centru d'Asturies onde se produz, conoció dende últimos de los 90 y sobremanera col reconocimientu de la denominación d'orixe, llograda nel 2004, un puxu que lu llevó a les baldes de los supermercaos y grandes superficies. Sicasí, la supervivencia del sector nun ye fácil. L'accesu a la materia prima, el lleche, ye cada vegada más difícil nun contestu como l'actual en que la ganadería tradicional ta desapaeciendo nos conceyos onde se produz l'Afuega'l Pitu, y amás el preciu de los quesos lleva años cuasimente ensin variaciones, lo que fai que'l marxe de beneficiu mengüe. Anque dende'l Gobiernu asturianu llegó a apuntase a la necesidá de qu'apaeciere una gran empresa que concentrare les ventes, ello ye que siguen teniendo pol productu una retafila d'empreses familiares que nun dexa de crecer. De fechu, Servanda García comentó que de va trés años p'acá se crearen seis empreses nueves d'Afuega'l Pitu."