L'Efmo.com ganó y sigue nos primeros puestos

"L’Efmo.com ganó al Majadahonda pol resultáu de 65 a 48 y ello dexa al equipu avilesín terceru na clasificación, empatáu col segundu –Zamora- a dolce victories y a una del primeru –Badajoz-, que tien trece. El resultáu ye engañosu, pues a les asturianes costó-yos ganar a les madrileñes, que nel primer tiempu nun pudieron desendolcar el so xuegu interior, al nun poder cola defensa en zona del equipu foriatu, llegándose al descansu 27 a 21.

Na segunda parte con Paula Fernández, que tuviera mancada pente la selmana, y con Berta Siñol l’equipu tuvo un ritmu de xuegu más intensu y la ventaya local enanchóse y asina finó’l tercer cuartu con un 46 a 33. Nel últimu cuartu les avilesines caltuvieron la ventaya y algamaron el trunfu por esi 65 a 48. Nel equipu local hai de destacar a Jerica Watson (8 puntos, 12 rebotes, 2 balones recuperaos, 1 balón perdíu, punxo 4 tapones y ficiéron-y 2 faltes personales), Dace Cinite (con dobles figures -11 puntos y 12rebotes-, 2 asistencies, 4 balones perdíos, punxéron-y 1 tapón y ficiéron-y 4 faltes) y Devon Campbell (11 puntos, 3 rebotes, 4 asistencies, 3 balones recuperaos, 2 balones perdíos y ficiéron-y 5 faltes).

Ficha téunica. Efmo.com: Berta Siñol (9), Orinta Kavaliauskaite (5), Devon Campbell (11), Debora Abreu (2) y Jerica Watson (8). Tamién xugaron: Paula Fernández (9), Esther Mesa, Maite Riera (4), Isabel García (6) y Dace Cinite (11).

C. B. Majadahonda: Irene Castrejón (8), María José Bolonio (3), Aitana Cuevas (2), Laura Sagredo (5) y María del Carmen Pardo (4). Tamién xugaron: Beatriz Moscardó (5), Sara Vita (12), Mafalda González-Alegre (9) y Ana López.

Árbitrios: Alberto Castro y Daniel Pazos. Nel Efmo.com nun hebo xugadores eliminaes por cinco faltes personales, nel equipu madrileñu foron eliminaes Irene Castrejón y Laura Sagredo. Partíu de la decimosesta xornada de la Lliga Femenina 2, xugáu nel Complejo Deportivo Avilés. Parciales per cuartos: 17-10, 10-11, 19-12 y 19-15."