Jedem das Seine. (Na muerte de Vincent Garcia, deportáu nu 42.553, Buchenwald)

Jedem das Seine. (A caún lo suyo). Ye lo que vieron na verxa del campu los guajes de 18 y 19 años y adultos qu’entraben en Buchenwald recién echaos a culatazos d’un tren de ganáu. Con Vincent llegaron dos mil. Yeren un granín p’aquel terrén inmensu de barraques y alambrera llétrica pel que pasó un cuartu millón de deportaos. Vieron y golieron el crematoriu de la que pasaron. Cada día contemplaben frente por frente el Zoo que’l Kommandant caltenía con mimu pa los sos nenos. Nun entendíen nada. Temíeronlo too cuando na Appelplatz vieron los “muertos vivos” que s’encontiaben unos con otros pa nun cayer. En tres meses él convirtiérase nún. 40 kilos. Perspectiva vital d’un día “Había que llegar vivu a la nueche. Eso yá yera oponese, resistir”. Nun sabe cómo aguantó, Taba seleccionáu na acción d’esterminiu Meerschaum, pero intuyímos el porqué: llegó’l final de la guerra. Con 28 quilos foi encargáu pola resistencia interna d’asegurar los archivos del campu pa que nun los destruyeren. Ente’l baturizu del saquéu reconocióse nuna foto d’una ficha qu’arrecaldó siempre.

Guardó la memoria de la deportación 30 años. Nadie entendía, podía imaxinar, qu’aquello pasare talamente. Pero nos 80, la negación obscena del Holocaustu y los campos remanez y deciden salir y contalo. Sí. Asocedió. Munchos colexos en Francia conocen a Messieur Garcia, Legion d’Honneur. Pero él mesmu pasa toos estos años esconxurando l’infiernu del KZ Buchenwald, nel que hai nueches que suaña que ta tovía.

Fai un añu confesóme que nunca contare tola experiencia completa a nadie, que yo yera’l primero en 42.553. La selmana pasada díxome qu’había coses que nun dixera, “¿por qué echaría tanto pa poneme a falar?”dixo depués. Nunca podremos saber qué tuvieron que pasar aquelles persones sometíes a la privación sistemática de la humanidá, a la fame, el fríu estremos y al desaniciu de la esperanza nun campu onde yeren obligaos a ver execuciones públiques exemplarizantes y una bandina de música recibía sádicamente a deportaos aquel llugar que golía permanentemente a carne amburao.

Pero la humanidá, furaba’l so camín. “Cuando amataben les lluces del campu, facíase’l silenciu, los presos, obligaos a dormir en porricu con una mantuca, baxaben como pantasmes a compartir cama al calor humano y les mantes. “Yo dormía con un polacu. Taba prohibío. Nun te podía pillar el Kapo, díbate la vida nello, pero facíemoslo toos”.

Pero Vincent sobrevivió, pa pasín ente pasu, asumir el deber éticu de tresmitir la memoria pa esconxurar, esta vez colectivamente, esos tiempos “Que nun vuelva pasar” dicía.

Ente los compañeros de deportación de Vincent en Buchenwald hubo miles de persones anónimes y bones de les que nunca sedremos pa saber nada. Húbolos, tamién que sedríen premios nobeles, presidentes de gobiernu, escritores. Stephane Hessel, autor de “Indignaos” foi ún d’ellos. Arrastrándose cada nueche depués del trabayu forzáu pal barracón foi pa imaxinar un mundu diferente, pa homes y muyeres del futuru, y tres la lliberación encargáron-y corredactar un documentu esencial qu’entama asina: “Tolos seres humanos son nacíos iguales en dignidá y derechos, …” Ye l’artículu ún de la Declaración Universal de los Drechos Humanos, base de los nuestros estaos y constituciones y asumío por prácticamente toles naciones de la tierra. Sí somos fíos d’aquellos excepcionales que decidieron aguantar un día más, d’imaxinar otru mundu y con ello facer posible que llegáremos hasta equí.

Efectivamente, Jedem das Seine. Xuan Santori

Xuan Santori dio a conocer la historía de Vicent García nel so ensayu ‘42.553: depués de Buchenwald’, XXIII Premiu Máximo Fuertes Acevedo.