Estrena presidencial con victoria milagrosa pal Real Uviéu

"Dempués de 94 minutos de nun ver fútbol nin aptitú nin actitú de nengún de los que taben nel prau, l'Uviéu fue a ganar un partíu que bien pudo ser el peor de la temporada y que solo la mayor de les suertes fizo que los azules pudieren llevase tres puntos. Muncho-yos tuvo que mancar a los de Logroño marchar pa La Rioja ensin un puntu cuando merecieron l'empate y tuvieron a piques de ganar. L'Uviéun nun xugó a nada en tol partíu, afogáu nel centru'l campu y ensin profundidá nin idees tuvo siempre domináu por un Logroñés CF al que solo la falta d'ambición y la mala suerte nel últimu minutu impidió marchar del Tartiere con daqué positivu.

Foron 94 minutos de non - fútbol nos que malapenes hubo ocasiones de gol nin xugaes d'interés. Cuando'l partíu yá taba pa finar, nel minutu 94, el Logroñés CF pudo llevase la victoria cola meyor ocasión del partíu. Con una bona xugada d'ataque y entrando dende atrás, Loro plantóse solo delantre Gastón, pero quixo mete-yla penriba y l'arxentín fue a parala, Gastón montó rápidamente'l contrataque y el balón cayó-y a Miguel, que cruzó tol prau pela izquierda pa centra-yla a Moisés que remató a gol a placer. Una afición con ganes de festexar dalgo rompió n'aplausos viendo como se pue pasar de perder un partíu a ganalu solo en cosa de segundos, cuestión de suerte qu'ayeri cayó del llau azul pero que nunca nun pue impidir ser conscientes de los defeutos y necesidaes d'una plantiya qu'hai de meyorar yá."