La Xunta Eleutoral anula la candidatura d'Independientes de Morcín pal 26-M

Taba formada por persones procedentes d'AMI y liderada pol edil Jesús Menéndez.

Independientes de Morcín, agrupación d'eleutores de creación nueva comprometida pa cola llingua asturiana que tenía como banderes principales de cara a les municipales del día 26 frenar la despoblación del conseyu y l'aprovechamientu de la situación estratéxica xeográficamente del llugar pa potenciar la marca Morcín, pa lo que contaben con un estudiu sociolóxicu fechu, nun va poder presentase a les eleiciones. Una denuncia de l'Agrupación Morciniega Independiente (AMI), de la que veníen la mayor parte de militantes, por una posible confusión ente l'electoráu pol nome de la candidatura foi almitida pola Xunta Eleutoral, lo que dexó ensin marxe d'actuación a la candidatura de Menéndez polos plazos curtios.

"Esta contrariedá namás va facenos más fuertes. Mientres esta futura llexislatura trabayaremos dende fuera del ayuntamientu, coles mesmes ganes, ilusiones y proyectos, y volveremos dientro de cuatro años p'atopanos nes urnes", apunten dende Independienes de Morcín. AMI, pela so parte, presenta como candidatu a Manuel Mallada, responsable de la denuncia, que nel momentu de la moción de censura d'Izquierda Xunida (IX) al alcalde socialista Jesús Álvarez Barbao opúnxose a la mesma xunto con otra anque l'asamblea de l'agrupación d'eleutores diera'l preste a la mesma por 7 a 2, siendo clave esi votu pa que saliere alantre.

Al final, Maximino García yera nomáu primer edil colos sofitos d'IX, Somos y AMI, que nun se salvó d'una escisión. L'edil Menéndez y les otres seis persones que siguieron tres la moción de censura decidieron apostar por crear Independientes de Morcín pa evitar problemes como l'asocedío agora cola denuncia a la Xunta Eleutoral, mentes que les dos persones que se salieron nel 2017 sí van poder acudir como AMI a les eleiciones del 26-M.

Na semeya, el conceyal por AMI Menéndez, que lideraba la llista d'Independientes de Morcín.