“La próxima llexislatura pue representar la meyor y más importante oportunidá histórica pal caltenimientu del idioma”, afirma González Riaño

El presidente de l’Academia de la Llingua Asturiana (ALLA), Xosé Antón González Riaño, calcó na neutralidá de la institución y afirmó nel so discursu pol XL Día de les Lletres Asturianes que “la próxima llexislatura pue representar la meyor y más importante oportunidá histórica pal caltenimientu del idioma”. Per primer vegada, una ministra, la de Sanidá, María Luisa Carcedo, acudió a actu del Teatru Campoamor, onde tamién se dexaron ver los candidatos de la FSA, Podemos, IX-IAS y Ciudadanos.

El tramu final de la so intervención dedícolu González Riaño a “la nueva llexislatura y el futuru de la llingua” aprovechando la cercanía coles eleiciones, convocaes pal 26 de mayu. Nesi puntu recordó que “la institución fórmenla persones, muyeres y homes, que, individualmente, tienen la so propia ideoloxía política. De fechu, na Academia tán representaes toles sensibilidaes polítiques; pero, sorrayo, toles sensibilidaes polítiques ‘democrátiques’”, pa depúes calcar en que “ye dafechu y escrupulosamente neutral dende’l puntu de vista políticu”.

“Pero la sociedá asturiana, los votantes y les votantes, nun van ser neutrales y van analizar los programes electorales tamién polo que fai referencia a les propuestes en materia de política llingüística y cultural. De xuru qu’una parte importante de la xente nun va decidir el so votu, esclusivamente, en función de la cuestión llingüística, pero sí xuntando ésta a los programes que se propongan p’abordar los graves problemes colos qu’arrecostina Asturies: crisis demográfica, ausencia de planificación científico-teunolóxica, emigración de la mocedá, paru y precariedá, desigualdá de xéneru, escaezu de l’Asturies rural, etc.”, siguió’l presidente.

Salga’l Gobiernu que salga’l 26-M, aseguró que “l’Academia siempres tará a disposición de l’alministración y de los sos xestores culturales pa siguir trabayando pola dignificación de la llingua y pol llogru definitivu del so afitamientu xurídicu”. Nesi sen, recordó que “a naide se-y escapa, nesti sen y teniendo en cuenta les propuestes electorales de les que se da anuncia, que la próxima llexislatura pue representar, a priori, la meyor y más importante oportunidá histórica pal caltenimientu del idioma asturianu”.

“L’Academia va siguir, igual que los movimientos sociales, nel llabor diariu y continuu de dignificación d’una llingua que representa, oxetivamente, un bien social p’Asturies y un derechu pa tolos ciudadanos que quieran facela de so en llibertá”, finó la so intervención depués de repasar la historia d’una institución “que yá reclamare Xovellanos nel sieglu XVIII”.

Per primer vegada “n’Uviéu”

Enantes, González Riaño comenzara recordando la recupearación de la toponimia tradicional de la capital del país, agora oficial, derogando la castellana. “Ye la primer vegada que, oficialmente, se fai esti actu en ‘Uviéu’. Sí, tamos en ‘Uviéu’ y eso ye mui importante, simbólicamente mui importante. A mi, que fui miembru de Conceyu Bable Uviéu, qu’estudié y soi profesor na Universidá d’Uviéu y que vivo nesta ciudá dende va más de 30 años, emocióname poder dicir que la capital d’Asturies ye ‘Uviéu’. Y entiendo meyor que nunca’l sentimientu que pudo tener otra muncha xente cuando, nel so momentu, Xixón, Llangréu, A Caridá o Les Regueres, por exemplu, pudieron recuperar la so denomación tradicional”.

Tres facer referencia al gallego-asturiano, que nestos 40 años últimos “supo tamén adautarse y medrar dende a perspeutiva llingüística, lliteraria, comunicativa y musical como a miyor forma d’asegurar qu’os sous usuarios tuveran os mesmos deretos llingüísticos qu’os demáis ciudadanos d’Asturias”, y enantes de citar el llabor académicu del añu últimu –adelantó l’unvíu a imprenta de los númberos II, III y IV del ‘Diccionariu Etimolóxicu de la Llingua Asturiana de Xosé Lluis García Arias–, faló de los dos académicos nuevos acoyíos ayeri, Pablo Texón y Alberto Fernández Costales. “Los sos méritos y el so valir, acabamos sentilo, son incuestionables, de mou que somos nós, los que yá tábemos na Academia, los que nos sentimos percontentos de poder cuntar col sofitu personal, organizativu y téunicu qu’implica pa la nuesa institución el fechu de poder trabayar a comuña con un escritor en llingua asturiana de la sonadía de Pablo Texón y con un investigador y sociollingüista de la solvencia d’Alberto Fernández”.

“Un home de la cantera”

El primeru de los académicos nuevos n’intervenir foi Texón, que principió diciendo que “ye de suponer que toi equí pol amor que proceso a les palabres. Paez que nun voi ser quien a demostralo. Paradóxicamente va ser difícil que pueda espresar verbalmente la emoción que siento y l’honor qu’esti reconocimientu xugó pa min”.

Nesi sen recordó que sentía “propia esta casa”, onde hai 15 años, nel llar antiguu de l’ALLA, acudió pa pidir ser becariu na institución. Un momentu nel que empezó “la esperiencia llaboral más guapa de la mio vida. Dos años nos que deprendí muncho”.

Nel 2005 estrenóse como profesor nos cursos de branu de l’ALLA n’Ibias, xerme de l’actual Universidá Asturiana de Branu (UABRA),  y dende entós nunca faltó con esta cita. “Quince años depués de too aquello, equí toi, pequeñu y agradecíu”, aseguró, pa después definise, nun símil futbolísticu, “como rapaz del filial, un home de la cantera qu’humildemente quier ayudar y que promete como mínimo sentir los colores”.

Nel so discursu cuntó un episodiu personal col so güelu, Luis Reguera, y afaló a tolos presentes a que “trabayemos pa que lo so llingua nun sía oxetu de muséu, nun sía flor de cementeriu; que trabayemos pa que tea viva y pa que lo siga tando munchos sieglos más”.  Pa finar, y emplegando unes pallabres mui asemeyaes a les qu’él mesmu usó na gala d’entrega de los Premios Lliterarios 2018 cuando recibió’l Xuan María Acebal de poesía por ‘Allumamientu’, dexó nidio que “los que trabayamos pola llingua asturiana, los que sufrimos pola llingua asturiana, los que nos enfotamos en salvar la llingua asturiana…, nun tamos nesto por dineru, nun tamos nesto por interés, nun tamos nesto por ambición… Tamos nesto por amor, y créanme, al final l’amor siempre gana”.

L’asturianu, pa favorecer la competencia en castellán

Fernández Costales, pela so parte, comenzó destacando que “la llingua propia ye la esencia de lo que somos porque ye’l reflexu d’un pueblu”, pa darréu recordar que lo primero que pensó tres la llamada de González Riaño pa comunica-y la decisión de l’ALLA foi “la enorme responsabilidá d’esta xera”. El so discursusu centrólu nos beneficios del billingüismu, dalgo de los que “pocos dulden”, y na importancia de la investigación, apuntando con “arguyu”, que dende l’Área de Didáutica de la Llingua y de la Lliteratura, col sofitu del Departamentu de Ciencies de la Educación de la Universidá d’Uviéu, “hai unos años que se tán faciendo investigaciones punteres al rodiu de la presencia del asturianu nel contestu educativu”.

“Hai resultaos qu’afirmen qu’asistir a clase d’asturianu favorez la competencia en castellán, amás de tener un impautu positivu na comprensión llectora en castellán na educación Primaria”, afirmó al respeuto, pa depués apuntar que “la investigación ye la ferramienta que nos permite tomar ciertes decisiones, o informar a los que tienen que tomar eses decisiones pa que puedan escoyer con más fundamentu. Pero teniendo claro que la llingua nunca, nunca ye un problema, sinón un recursu y un derechu, y una solución”.

Hevia y autoridaes

L’actu, que comenzó con una interpretación del cordionista Marcos García Alonso, siguó con una llectura de poemes del númberu 35 de la revista ‘Lliteratura’, a cargu de María Cotiello y Lluis Aique Fernández Iglesias, y nun conciertu d’Hevia. El gaiteru acudió al Campoamor con un formatu tríu xunto cola so hermana María José Hevia, a les percusiones, y el pianista Roberto Jonata, interpretando cantares asturianos como ‘Alba’ y ‘Carretera d’Avilés’, amás de pieces como ‘Volver’, ‘El día que me quieras en La Habana’ o ‘Asturias (Leyenda) d’Isaac Albéniz pa gaita’.

L’himnu d’Asturies, interpretáu por Hevia a la gaita, punxo’l ramu a la xunta estraordinaria, que destacó pola presencia de numberoses autoridaes. Ente elles destacó la de la ministra de Sanidá, Consumu y Bienestar Social en funciones, la socialista María Luisa Carcedo, amás de los candidatos de cuatro de los seis partíos con representación na Xunta Xeneral: Adrián Barbón (FSA), Lorena Gil (Podemos), Ángela Vallina (IX-IAS) y Juan Vázquez (Ciudadanos).

Por Foro acudió l’ex congresista Isidro Martínez Oblanca y el conceyal de Seguridá Ciudadana, Movilidá y Tresportes de Xixón, Esteban Aparicio, mentes que pol PP foi Cristina Alonso, presidenta del PP de Llaviana, xunto col edil José María González Fernández, y Julio Cedrón, conseyeru na RTPA. En representación del Gobiernu tuvo Genaro Alonso, conseyeru d’Educación y Cultura, y Fernando Padilla, direutor xeneral de Planificación Llingüística y Normalización.

Otres persones destacaes foron l’eurodiputáu Jonás Fernández Álvarez, la diputada Elsa Pérez García y los alcaldes d’Uviéu (Francisco Wenceslao López), Cabranes (Gerardo F. Llavona), Colunga (Sandra Cuesta), Miranda (Rosa Rodríguez) y El Franco (Cecilia Pérez), pola FSA; la congresista Sofía Fernández Castañón, el secretariu xeneral Daniel Ripa y los diputaos Andrés Fernández Vilanova ‘Ron’ y Enrique López Hernández, por Podemos;  les diputaes Concha Masa y María Josefa Miranda, por Izquierda Xunida (IX); Faustino Zapico, secretariu xeneral d’Izquierda Asturiana (IAS); y el diputáu Nicanor García Fernández, por Ciudadanos. Tamién acudieron numberosos cargos y profesores de la Universidá d’Uviéu y representantes de sindicatos y de dellos organismos.