La música suena pa festexar el XL Día de les Lletres Asturianes

Asturies celebra esti vienres el XL Día de les Lletres Asturianes, dientro d'una selmana dedicada a la música asturiana de los 40 años postreros, gran ferramienta normalizadora del idioma. L’ALLA entama la so xunta estraordinaria nel uveín Teatru Campoamor, na que recibe a Pablo Texón y Alberto Fernández Costales como académicos, y la sociedá civil sal a la cai pa reclamar la oficialidá.

L’actu académicu va dar comienzu a les 20.30 hores con una interpretación del cordionista Marcos García Alonso. Tres la entrada de les académiques y académicos al teatru, Sonia Avellaneda y Próspero Morán, conductores del eventu, van dar pasu a l’acoyida por parte del presidente de l’Academia de la Llingua Asturiana (ALLA), Xosé Antón González Riaño, de Texón y Fernández Costales como académicos correspondientes de la institución. 

L’escritor de Felechosa, llicenciáu en Filoloxía Española y Especialista en Filoloxía Asturiana, trátase de “ún de los autores más renomaosde la lliteratura asturiana d’anguaño”, destacando tamién pol so llabor como narrador, traductor o lletrista de grupos musicales. Pela so parte, el xixonés ye doctor en Filoloxía Inglesa, profesor del Área de Didáutica de la Llingua y la Lliteratura dientro del Departamentu de Ciencies de la Educación de la Universidá d’Uviéu y coordinador del Programa de Doctoráu n’Educación y Psicoloxía, siendo un espertu en sociollingüística.

Darréu González Riaño va dar el siempre esperáu discursu institucional, pa pesllar l’actu con una llectura de poemes y la tradicional actuación musical, qu’esti añu va contar cola presencia del nuesu gaiteru más internacional. José Ángel Hevia va interpretar con un formatu tríu una esbilla del so trabayu últimu ‘Al son del indianu’, nel qu’amiesta sones asturianos con caribeños y llatinos.

Manifestación ‘L’asturianu llingua oficial’

Una hora enantes de la xunta estraordinaria de l’ALLA, a les 19.30 hores de la Estación del Norte (Renfe), va salir la marcha ‘L’asturianu llingua oficial’. Un añu más, la Xunta pola Defensa de la Llingua Asturiana (XDLA) llama a la sociedá civil a manifestase pa demadar la igualdá de derechos de los falantes d’asturianu y gallego-asturiano colos de castellanu n’Asturies.

Día del Llibru n’Asturianu

La Conseyería d’Educación y Cultura súmase a la celebración del Día de les Lletres Asturianes col entamu de delles actividaes, destacando’l Día del Llibru n’Asturianu. A lo llargo de tol día, mediu centenar de llibreríes de tol país venden discos y llibros con un 10 por cientu de descuentu, entregando de baldre tamién por cada merca’l doble CD conmemorativu de la XL Selmana de les Lletres Asturianes ’40 años al son de la nuestra música/40 anos al son da nosa música’, con una esbilla de cantares de los 40 años postreros n’asturianu y gallego-asturiano.

Les llibreríes y tiendes participantes son: Aldebarán, Antares, El Búho Lector, Casa del Libro, Cervantes, Chemi, El Corte Inglés, Diocesana, Elías, Esfera, Garluc, Maribel, La Palma, Polledo, Puntos, Reconquista, San Pablo, II Milenio y Trabe (en llinia), n'Uviéu; Acuarel, De Bolsillo, La Buena Letra, Casa del Libro, Central, El Corte Inglés, 4 Letras, Paradiso y Roy, en Xixón; Casona, Centru Niemeyer, Clarín, El Corte Inglés, Víctor Núñez y Elepé Productions, n'Avilés; Disco 55, La Pilarica, La Torre y La Llocura, en Mieres; Pablo, en Bual; Treito, en Cangas del Narcea; Imagen, en Cangues d'Onís; Alfonso, n'A Caridá; Muséu de la Sidra, en Nava; Gestión, en Les Arriondes; Rima, en L'Infiestu; Sol, en L'Entregu; Eroski y FNAC, en Paredes; Naredo, en La Pola Siero; y Casa Pérez, Patefa, y San Pedro, n'A Veiga. Amás, a lo llargo de tola fin de selmana, va celebrase na uvieína plaza Trascorrales la VII Feria del Llibru y Discu n’Asturianu, onda tamién va regalase’l doble CD con cada merca.

Otra manera, esta mañana celebróse nel Colexu Públicu Lorenzo Novo Mier, d’Uviéu, l’actu escolar institucional de celebración de la Selmana de Les Lletres cola entrega de los premios del XXIV Certame de Creación Artística/Lliteraria, el XVI Certame de Cartelismu y el VIII Certame de Creación Audiovisual. Nel mesmu tuvo presente’l conseyeru Genaro Alonso; Fernando Padilla, direutor xeneral de Planificación Llingüística y Normalización; y l’alcalde Francisco Wenceslao López.