Celébrase'l Primeru Mayu con manifestaciones en Mieres y Xixón

Esti miércoles ye'l Día Internacional de los Trabayadores. Un bloque soberanista va participar na marcha de los 'minoritarios'.

Comisiones Obreres (CC OO) y la Unión Xeneral de Trabayadores (UXT) entamen esti añu la manifestación na cuenca'l Caudal, depués de que l'añu pasáu escoyeran la del Nalón. Asina, Mieres da'l relevu a Llangréu como sede d'una movilización baxo'l lema 'La lucha continúa. +Derechos, +Igualdad, +Cohesión. Primero las personas' con salida al meudía del campus universitariu.

A la mesma hora, de la Casa Sindical de Xixón, van partir la Corriente Sindical d'Izquierda (CSI), la Confederación General del Trabajo (CGT), el Sindicatu Unitariu Autónomu de Trabayadores de la Enseñanza (SUATEA) y la Confederación Nacional del Trabajo (CNT) col lema 'Conciencia y llucha de clases'. #LluchandoPolaSoberanía entama un bloque soberanista pa esta manifestación.

Pela so parte, la Unión Sindical Obrera (USO) celebra'l so actu central en Santander.